Согтуу нагацдаа гарын дөрвөн хуруугаа тайруулж, хөлөө түлүүлсэн долоон настай охинд өчигдөр Гэмтэл согогийн үндэсний төвд мэс засал хийж, гурван хурууг нь залгаж чаджээ. Тасарсан нэг хуруу хэдийн үхэжсэн байсан тул залгах боломжгүй байлаа гэж эмч нар ярив. Хуруунуудаа тасдуулсан охин зугтаж гараад гудамжинд цусаа урсган зогсч байхад нь хавь ойрынх нь хүмүүс цагдаад мэдэгдсэн байна. Харин 51 настай эр “ухаанаа алдтал согтсон байсан учраас юу хийснээ мэдээгүй” гэж цагдаад мэдүүлжээ.

Мөн Баянгол дүүргийн нутаг дэвсгэрт амьдардаг иргэн Х нь 2016 оны хоёрдугаар сараас 2018 оны гуравдугаар сар хүртэл хугацаанд үргэлжилсэн үйлдлээр 13 настай дагавар охиноо байнга хүчиндсэн гэмт хэрэг гарсан байна. Түүнийг хүчиндэх гэмт хэргийг бага насны хүүхдийн эсрэг үйлдсэн гэм буруутайд тооцож, 20 жилийн хорих ялыг оногдуулж, хаалттай хорих байгууллагад ялыг эдлүүлэхээр шийдвэрлэсэн тухай мэдээлжээ.

“Өдрийн сонин”-ы саяхны нэг дугаарт УИХ-ын гишүүн, Хүний эрхийн дэд хорооны дарга Н.Оюундарийн ярилцлага нийтлэгдсэн байна. Уг ярилцлагад хүчингийн хэргийн дийлэнх нь насанд хүрээгүй охид байна. Судалгаасаас үзвэл, тэдний дийлэнх нь 15 нас хүртлээ аавынхаа болон хойд эцгийнхээ өвөрт унтдаг байжээ гэсэн байна. Өөрөөр хэлбэл, гэр бүлийн буруу хэвшил, амьдрах орчны нөлөөлөл насанд хүрээгүй хүүхдийг бэлгийн хохирогч болгож байна аа гэсэн үг.

Хүүхдүүдээ яана аа? гэхээр дахиад л нөгөө цаазын ялын тухай яриа сэргээд ирлээ. Ерөнхийлөгчөөсөө (Х.Баттулгаас) эхтэй юм. "Хүүхдүүд хүчирхийлэлд өртөх нь ихэслээ" гэхээр зөрүүлээд “Тэгвэл цаазын ялтай болъё” гэдэг. Хэрвээ хүчиндсэн этгээдийг цаазлаад энэ хэргийг хор уршиг, үр дагавар арилдаг бол яая гэхэв. Гэтэл харамсалтай нь тийм биш. Энэ төрлийн гэмт хэрэг үйлдэгдэх суурь, нөхцөл нь манай нийгэмд, бүр гэр бүл дотор байна аа гэсэн үг. Харин үүний эсрэг ямар арга хэмжээ авах вэ? УИХ-аар баталсан Хүүхэд хамгааллын тухай хууль чинь яг юунд зориулсан хууль юм бэ?

Охин хүүхдүүд яагаад 15 нас хүртлээ аавынхаа, эсвэл хойд эцгийнхээ өвөрт унтах ёстой юм бэ? Эх хүн яагаад ийм нөхцөл байдлыг хүлээн зөвшөөрөөд, хүлцэн тэвчээд байгаа юм бэ? Долоохон настай хүүхдийг яагаад ухаан мэдрэлгүй болтолоо архиддаг нэг согтуугийн гар дээр орхиж байгаа юм бэ? гэдэг чинь нийгмийн том асуудал болоод байна. Тэгвэл энэ нэр бүлүүдийг ч гэсэн бүгдийг нь цаазлах уу?

Үүнээс үзэхэд цаазын ялыг сэргээснээр хүчирхийллийг таслан зогсооно гэж байхгүй. Таслан зогсоодог тийм ид шид байдаг байлаа гэхэд бид цаазын ялаас ухрах ямар ч боломжгүй болсон. Яагаад гэвэл бид Цаазын ялаас татгалзах тухай олон улсын конвенцид олон жилийн өмнө нэгдэж орсон. Түүнийхээ араас Эрүүгийн хуульдаа өөрчлөлт оруулж, цаазын ялыг халсан. Одоо үүнээсээ буцна гэвэл конвенцид нэгдсэн 100 гаруй оронтой Монгол Улс нэг бүрчлэн хэлэлцээ хийж байж конвенциос гарах болно. Түүнд хэдэн жилийн хугацаа зарцуулахыг таашгүй. Бас үр дагавар нь юунд хүргэх ч гэсэн тодорхойгүй.

Тиймээс манай Ерөнхийлөгчийн “Цаазын ялыг сэргээнэ” гэсэн нь эхнээсээ хуурмаг, хоосон үг байсан. Асуудлыг шийдвэрлэх биш, зугтах гэсэн арга зам, хоосон популизм.

Б.СЭМҮҮН