Өчигдөр орой Засгийн газрын ээлжит хуралдаанаас Байгалийн түүхийн музейг Их тэнгэрийн аманд нүүлгэх шийдвэр гаргажээ. Музейн барилгын ажлыг гүйцэтгэхэд шаардлагатай техникийн нөхцөл, зөвшөөрлийг холбогдох хууль, журмын дагуу олгож дэмжлэг үзүүлж ажиллахыг Байгаль орчны сайд сайд Н.Цэрэнбат, Барилга хот байгуулалтын сайд Х.Баделхан, Эрчим хүчний сайд Ц.Даваасүрэн, Нийслэлийн Засаг дарга С.Амарсайхан нарт үүрэг болгосон байна. (Боловсролын сайдыг оролцуулаагүй нь сонин хэрэг шүү)

Музейн барилгыг нурааж, шинэ барилга барьж өгнө гэсэн Ерөнхий сайдын амлалт ийм нэг нүүрээ нуусан дээрэм болж хувирав. Хотын төвийн А зэрэглэлийн газар ингээд У.Хүрэлсүхийн халаасанд орчихлоо. М.Энхболдыгаа “газрын наймаачин” гэж ухсаар байгаад унагаж авсан МАН-ын дарга өөрөө гэгээн цагаан өдрөөр дээрэм хийж эхэллээ.

Байгалийн түүхийн музей нь 1924 онд Үндэсний музей нэртэйгээр анх байгуулагдсан. Харин 1955 онд одоо байгаа энэ байрандаа нүүж орсон аж. Барилгын ашиглалтын хугацаа нь бүрэн дууссан бөгөөд 2013 оны тавдугаар сараас Байгалийн түүхийн музейн олон нийтэд үйлчлэх үндсэн үйл ажиллагааг зогсоож, барилгын суурин дээр музейн шинэ барилгыг барихаар төлөвлөжээ. Харин У.Хүрэлсүхийн нүдэнд энэ газар “мөнгө” болж харагдсаар удсан бололтой.

Уг музей нь Монгол орны газар зүй, геологи ашигт малтмал, ургамал, амьтны аймаг, палеонтологийн ховор олдвор, хүн судлалтай холбоотой 6000 орчим үзмэртэй. Жилийн дөрвөн улиралд хүүхэд багачууд, гадаадын, додоодын жуулчдад үзэсгэлэнгээ дэлгэж үзүүлдэг Монголын хамгийн соёлын газруудын нэг. Ингэхэд музейг байлгахын төлөө байлгадаг юм биш, хүнд үзүүлэх гэж байлгадаг. Хотын төвдөө байвал хүүхэд, залуучууд хүссэн үедээ орж үзэх боломжтой. Их тэнгэрийн ам руу нүүлгэчихвэл хэн тэр олон давхар хамгаалалтыг нэвтэрч музей үзэх болж байна?

Харин музейг Их тэнгэрийн аманд шилжүүлэх болсон шалтгаан дэндүү ойлгомжтой. Хотын төвийн газрын үнэ өндөр тул музейн газрыг зарж ашиг олох гэснээс өөр тайлбар үгүй. Одоо цагт Улаанбаатар хотын хаанаас ч гэсэн алга дарам сул газар хайж олоход бэрх болсон. Э.Бат-Үүлийн үед хуучин Сүхбаатар хэвлэлийн газрыг дуудлага худалдаагаар борлуулахад л 23 тэрбум төгрөг болж байсан юм шүү дээ. Харин Байгалийн түүхийн музейн газар түүнээс хэд дахин илүү үнэ хүрнэ. Энэ л музейн барилгыг хотын төвөөс гаргаж, газрыг нь дээрэмдэх ганц шалтгаан болсон байна.

Ердөө хэдхэн хоногийн өмнө Ерөнхий сайд цүнх баригчдаа дагуулаад музейн барилгыг ирж үзсэн. Үзээд шинэ байшин барьж өгөхөөр музейн ажилтнуудад амласан байдаг. Тэр үед тэдний дунд ямар яриа хэлцэл болсныг мэдэхгүй ч музейг Их тэнгэр лүү нүүлгэх энэ шийдвэр лав нэг өдрийн дотор гараагүй байх. Хэрвээ тийм биш бол газраа дээрэмдүүлсэн музейн удирдлагууд, соёл, шинжлэх ухааны байгууллагынхан яагаад амандаа ус балгасан мэт дуугүй байх гэж?  У.Хүрэлсүхэд хэн ийм их зоригийг өгөөд байна вэ? Соёл, шинжлэх ухааны сайд нь ядахдаа яагаад дуугүй өнгөрч байгаа юм.

Хэрвээ түүхийн музейн газрыг иймэрхүү аргаар дээрэмдэх гэж байгаа бол Боловсролын сайдаараа “туг тахина” шүү, У.Хүрэлсүх ээ! Монголын бүх багш нар, шинжлэх ухаан, соёлын салбарынхан босоход нэг сайдаар “шүд сугалах” юу ч биш. Сонгууль ойртож байгаа энэ үед овоо босгож шаазгай шуугиулахын хэрэг юу байна?

Б.ЗАЯА