Саран дээр бааз байгуулах төлөвлөгөөний хүрээнд илгээхээр төлөвлөж буй газардагч робот, хөөрөгч дрон болон тээврийн хэрэгслүүдийн талаарх дэлгэрэнгүй мэдээллийг НАСА өглөө.

"Амазон" компанийг үүсгэн байгуулагч Жефф Безосын сансрын технологи, судалгааны "Blue Origin" компани бол эдгээр төхөөрөмжийг зохион бүтээхээр шалгарсан хэд хэдэн компанийн нэг юм.

АНУ-ын Ерөнхийлөгч Дональд Трампын бүрэн эрхийн хугацаа 2029 онд дуусгавар болохоос өмнө америкчуудыг дахин Саран дээр буулгахыг НАСА зорьж байгаа юм. Гэхдээ Саран дээр дахин хүн буулгахаар БНХАУ-тай өрсөлдөж буй НАСА-гийн хувьд энэ нь нэр хүндийн асуудал, сорилт болж байгаа юм.

Өнгөрсөн гуравдугаар сард НАСА 2032 он гэхэд сарны өмнөд туйлд цөмийн болон нарны эрчим хүчээр ажилладаг байнгын бааз байгуулах 20 тэрбум ам.долларын өртөг бүхий хөтөлбөрийг зарласан билээ. Ингээд мягмар гарагт тус агентлаг дээрх төхөөрөмжүүдийг зохион бүтээж, үйлдвэрлэх гэрээг "Blue Origin", "Intuitive Machines", "Astrobotic" зэрэг компанитай байгуулснаа мэдэгдлээ.

Мөн 2032 он гэхэд хүмүүсийг Саран дээр "хагас байнгын" зориулалттай сууцанд амьдрах боломжтой болгохоор НАСА ажиллаж байгаа ажээ.