Монгол Улсын Засгийн газар, АНУ-ын Мянганы сорилтын корпорацын II компакт гэрээний хүрээнд хэрэгжүүлж буй “Улаанбаатар хотын ус хангамжийг нэмэгдүүлэх” хөтөлбөрийн нэг чухал хэсэг болох “Ус хэрэглэгчийн цахим систем”-ийн хэрэгжилт 80 орчим хувийн гүйцэтгэлтэй үргэлжилж байна. Тус систем нь хэрэглэгчдэд усны хэрэглээ, үнэ тариф, төлбөр тооцооны мэдээллийг цахимаар хялбар, ил тод авах боломжийг бүрдүүлж, усны үйлчилгээний чанар, хүртээмжийг шинэ түвшинд гаргах зорилготой юм.

2025 оны арванхоёрдугаар сарын 31-ний дотор бүрэн нэвтрүүлэхээр төлөвлөсөн тус системийн хөгжүүлэлтийг “Аствишн” ХХК гүйцэтгэж байгаа бөгөөд дараах бүрдэл хэсгүүдийг багтаажээ:

• Хэрэглэгчийн мэдээллийн сангийн бүрдүүлэлт, хөгжүүлэлт

• Төлбөр тооцооны дэд систем

• Хэрэглэгчийн портал систем

• Нэгдсэн дуудлагын төв, санал гомдлын удирдлагын систем

НЗДТГ-ын дарга Д.Амгалан АНУ-ын Мянганы сорилтын корпорац, Азийн сан болон гүйцэтгэгч байгууллагын төлөөлөлтэй уулзах үеэрээ уг төсөл нь усны салбарын урт хугацааны тогтвортой хөгжил, хэрэглэгчийн үйлчилгээний түвшинг дээшлүүлэхэд чухал үүрэг гүйцэтгэнэ гэдгийг онцлон тэмдэглэлээ.

Мөн АНУ-ын Мянганы сорилтын корпорацын Хүний хөгжлийн асуудал эрхэлсэн захирал Алисон Монтгомери төслийн хэрэгжилт, хамтын ажиллагаанд сэтгэл хангалуун байгаагаа илэрхийлж, мэдээллийн сангийн бүрдүүлэлт, системийн урт хугацааны тогтвортой байдлыг хангахад анхаарах хэрэгтэйг дурдсан байна.

Төслийн эхлэл 2024 оны есдүгээр сарын 5-нд тавигдаж, есдүгээр сарын 20-нд Нийслэлийн Засаг даргын захирамжаар ажлын хэсэг байгуулан, хууль эрх зүйн судалгаа, төлөвлөлтийн ажлыг шуурхай хэрэгжүүлсэн. Усны салбарын тогтвортой байдлыг хангах төслийн захирал Л.Өнөржаргал энэхүү судалгаа өндөр түвшинд хийгдэж байгааг онцлон тэмдэглэлээ.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс