Ардын хувьсгалын 104 жилийн ой, Үндэсний их баяр наадмыг угтан эрхэлсэн ажилдаа амжилт гаргаж, эх орныхоо хөгжилд хувь нэмэр оруулсан салбар салбарын хүндэт эрхмүүдийг төрийн дээд одон, медалиар шагнадаг уламжлалтай.

Улсын Хүүхэд Залуучуудын Театр (УХЗТ)-ын театрын ахмад жүжигчин, БНМАУ-ын Төрийн шагналт, Монгол Улсын Гавьяат Жүжигчин Ц.Төмөрбаатар өнөөдөр Ардын жүжигчин цолоор шагнууллаа. Ардын жүжигчин цол хүртсэн Ц.Төмөрбаатар сэтгүүлчдэд сэтгэгдлээ хуваалцжээ.

Ц.Төмөрбаатар:

-Өнөөдөр миний хувьд сайхан өдөр байлаа. Төр засагтаа хөдөлмөрөө үнэлүүлж, хүндлүүлнэ гэдэг бол маш сайхан. Ардын жүжигчин цол авсандаа баяртай байна. Аавтайгаа адилхан цолтой болсондоо баяртай байна. Аав, ээж минь тэнгэрээс харж байгаа байх, хүүгээрээ бахархаж байгаа байх. Гадаа манай театрынхан ах дүү хамаатан сэтгэл догдлоод хүлээж байгаа. Найз нөхөд бүр их догдолж хүлээж байгаа.

Намайг хүүхэд залуучуудын театрт ажилладаг байхад энэ театр хүүхэд залуучуудын төлөө бүх уран бүтээлээ зориулдаг байсан. Өнөөдөр ч гэсэн энэ байдлаар ажиллаж байгаа. Хүүхэд залуучууд маань театрт очиж, жүжиг үзэж, оюун санаандаа хөрөнгө оруулалт хийх хэрэгтэй. Жүжигчин хүн өөрийнхөө бүтээсэн дүр болгондоо хайртай байдаг. Бүтээсэн дүрээс олон түмэнд хүрсэн дүр Амьдралын нахиа киноны Баяраа, Жамухын дүр гэх зэрэг олон дүр бий.