Засгийн газрын ээлжит хуралдаан долоодугаар сарын хоёрны өдөр болж, төрийн байгууллагын чиг үүргийн давхардал, хийдлийг арилгах, хүнд суртлыг багасгах, шат дамжлагыг цөөрүүлэх, иргэдэд үзүүлэх төрийн үйлчилгээний шуурхай, чанартай байдлыг дээшлүүлэх зорилгоор Засгийн газрын агентлаг, төрийн өмчит үйлдвэрийн газар, компаниудын чиг үүрэг, бүтэц, орон тоог оновчтой тогтоох арга хэмжээ авахыг Засгийн газрын гишүүдэд даалгасан байна.

Үүнд:

• Төрийн агентлаг, төрийн өмчит үйлдвэрийн газар, компанийн үйлчилгээний үндэслэл, хэрэгцээ шаардлагыг нарийвчлан судалж, үйл ажиллагааны чанар, үр дүнг дээшлүүлэх

• Шат дамжлагыг бууруулж, чиг үүргийн давхардал, хийдлийг арилгах

• Бүтэц, орон тоог бууруулж оновчтой болгох

• Агентлагийн стратеги, бүтцийн өөрчлөлтийн хөтөлбөрийг боловсруулахдаа ажил үүрэг нь яам, агентлаг, харьяа байгууллага болон төрийн бус байгууллага, мэргэжлийн холбоодын үйл ажиллагаатай давхардахгүй байх зарчим баримтлах

• Агентлагуудын нэгжийн нэршил яамны нэгжтэй давхцахгүй байх, дэд, орлогч дарга томилохгүй, дотооддоо хэлтэс байгуулахгүй, хэлтэс нь цааш тасаг, албатай байхгүй байх зохион байгуулалтын загварыг мөрдөж, орон тоог цөөлөх

• Орон тооны дээд хязгаарыг төсвийн хэмнэлттэй уялдуулан тогтоох

Эдгээр арга хэмжээ нь төрийн үйлчилгээний хүртээмж, чанарыг сайжруулахын зэрэгцээ төсвийн үр ашгийг нэмэгдүүлэх чухал алхам гэж үзэж буйг хуралдаанаар онцолжээ.

Эх сурвалж: Монгол Улсын Засгийн газар