Монгол Улсын Ерөнхий аудитор С.Магнайсүрэн өчигдөр УИХ-ын Нийгмийн бодлогын байнгын хороонд 2024 оны төсвийн гүйцэтгэл, санхүүгийн тайланд хийсэн аудитын дүгнэлтээ танилцуулсан байна. Гэр бүл, хөдөлмөр, нийгмийн хамгааллын сайдын багцын санхүүгийн нэгтгэсэн тайланд “хязгаарлалттай” дүгнэлт өгч, харьяа 102 байгууллагад “өөрчлөлтгүй”, 34 байгууллагад “хязгаарлалттай”, хоёр байгууллагад “сөрөг” дүгнэлт өгсөн бол нэг байгууллагын тайланд дүгнэлт өгөхөөс татгалзжээ.

Санхүүгийн тайлангийн аудитаар нийт 141.2 тэрбум төгрөгийн зөрчил илэрсэн бөгөөд үүнээс 0.2 тэрбум төгрөгийн зөрчилд 62 төлбөрийн акт тогтоож, 105.7 тэрбум төгрөгийн зөрчлийг таслан зогсоох тухай 62 албан шаардлага, 2.8 тэрбум төгрөгийн зөрчилд хариуцлага тооцох есөн албан шаардлага хүргүүлсэн байна. Мөн 32.2 тэрбум төгрөгийн зөрчлийг дахин гаргахгүй байх зорилгоор 207 зөвлөмж өгч, 0.2 тэрбум төгрөгийн гурван зөрчлийг хууль хяналтын байгууллагад шилжүүлэх шийдвэр гаргажээ. Аудитын явцад нягтлан бодох бүртгэл, тайлагналтай холбоотой 95.5 тэрбум төгрөгийн алдааг залруулж, 0.1 тэрбум төгрөгийн алдааг засах зөвлөмж өгсөн байна.

Нийцлийн аудитын хүрээнд нийт 253.8 тэрбум төгрөгийн зөрчил илэрч, 232.7 тэрбум төгрөгийн зөрчлийг таслан зогсоох тухай 56 албан шаардлага, 2.2 тэрбум төгрөгийн зөрчилд хариуцлага тооцох есөн албан шаардлага хүргүүлсэн бөгөөд алдаа, зөрчлийг дахин гаргахгүй байхаар 18.9 тэрбум төгрөгт холбогдох 105 зөвлөмж өгчээ.

Улсын төсвийн хөрөнгө оруулалтаар нийт 134 тэрбум төгрөгийн төсөвт өртөгтэй, 2024 онд 48.7 тэрбум төгрөгийн санхүүжилттэй 43 төсөл, арга хэмжээг хэрэгжүүлэхээр баталснаас одоогоор 61 хувийн санхүүжилтийг олгосон байна.

Аудиторын тайлбарласнаар, дүгнэлт өгөхөөс татгалзсан тайлан гэдэг нь аудитын ажлын цар хүрээ хязгаарлагдаж, зарим мэдээлэлд бүрэн хяналт хийх боломж хангагдаагүй, эсвэл шаардлагатай нотлох баримт олдоогүй нөхцөлд гардаг бөгөөд энэ тохиолдолд аудитын байгууллага хангалттай үндэслэлээр дүгнэлт гаргаж чадаагүй гэж ойлгох хэрэгтэй. Харин “сөрөг” дүгнэлт авсан байгууллагын хувьд илэрсэн алдаа, тодорхой бус байдал нь санхүүгийн мэдээллийг буруу ойлгуулж, хэрэглэгчдэд алдаатай шийдвэр гаргах эрсдэл учруулахуйц ноцтой байгааг илэрхийлдэг болохыг Ерөнхий аудитор онцлон тайлбарлав.

Эх сурвалж: УИХ