Монгол Улсын Ерөнхий аудитор С.Магнайсүрэн өчигдөр УИХ-ын Нийгмийн бодлогын байнгын хороодын хуралдаанд 2025 оны төсвийн гүйцэтгэл болон санхүүгийн тайланд хийсэн аудитын дүгнэлтээ танилцуулсан байна. Эрүүл мэндийн сайдын багцын санхүүгийн нэгтгэсэн тайланд “хязгаарлалттай” дүгнэлт өгч, харьяа хоёр зуун наян есөн байгууллагад “өөрчлөлтгүй”, тавин есөн байгууллагад “хязгаарлалттай”, гурав байгууллагад “сөрөг” дүгнэлт өгсөн бөгөөд хоёр байгууллагын тайланд дүгнэлт өгөхөөс татгалзжээ.

Аудитаар нийт 113.9 тэрбум төгрөгийн алдаа зөрчил илэрсэн байна. Үүний хүрээнд 1.4 тэрбум төгрөгийн зөрчилд 269 төлбөрийн акт тогтоож, 89.7 тэрбум төгрөгийн зөрчлийг таслан зогсоох тухай 462 албан шаардлага хүргүүлж, 19.2 тэрбум төгрөгийн зөрчлийг дахин гаргахгүй байх талаар 650 зөвлөмж өгчээ. Мөн 3.1 тэрбум төгрөгийн зөрчилд хариуцлага тооцох тухай 18 албан шаардлага, 0.5 тэрбум төгрөгийн хоёр асуудлыг хууль хяналтын байгууллагад шилжүүлэх шийдвэр гаргасан байна. Аудитын явцад нягтлан бодох бүртгэл, тайлагналын алдааг 133.6 тэрбум төгрөгөөр залруулсан тухай мэдээлэв.

Нийцлийн аудитын хувьд нийт 235.2 тэрбум төгрөгийн зөрчил илэрч, 4.5 сая төгрөгийн зөрчилд нэг төлбөрийн акт тогтоон, 226.0 тэрбум төгрөгийн зөрчлийг таслан зогсоох тухай 103 албан шаардлага, 8.9 тэрбум төгрөгийн зөрчилд 221 зөвлөмж өгч, 0.3 тэрбум төгрөгийн нэг зөрчилд хариуцлага тооцох албан шаардлага хүргүүлжээ.

Улсын төсвийн хөрөнгө оруулалтын хүрээнд 691.1 тэрбум төгрөгийн төсөвт өртөгтэй, 282.6 тэрбум төгрөгийн санхүүжилттэй 128 төсөл, арга хэмжээг хэрэгжүүлэхээс 80 төсөл, арга хэмжээг шинээр баталсан бол 221.5 тэрбум төгрөгийн өртөгтэй 44 барилга байгууламжийг ашиглалтад оруулахаар төлөвлөснөөс 140.1 тэрбум төгрөгийн өртөгтэй 30 барилга байгууламжийг ашиглалтад оруулсан байна. Нийт төсөл, арга хэмжээний гүйцэтгэлд 58.1 хувийн санхүүжилт олгосон гэж танилцууллаа.

Аудитын тайлан “дүгнэлт өгөхөөс татгалзсан” гэсэн ангилалд орсон тохиолдолд аудитын ажлын цар хүрээг хангалттай бүрдүүлээгүй, зарим баримт бичиг, материалд нэвтрэх боломж олгоогүй, эсвэл аудиторын шалгах нөхцөл боломжийг хязгаарласан үед гардаг болохыг Ерөнхий аудитор тайлбарлав. Энэ нь аудитын байгууллага хангалттай нотолгоо авч чадаагүйгээс болж тайлангийн үнэн бодит байдалд дүгнэлт өгөх боломжгүй гэж үзсэн гэсэн үг юм.

Харин “сөрөг” дүгнэлтийг зарим байгууллагад өгсөн нь аудитын явцад илэрсэн тодорхой бус, ноцтой алдаа нь материаллаг нөлөө үзүүлж, хэрэглэгчид тайлангийн мэдээлэлд үндэслэн буруу шийдвэр гаргах эрсдэлтэй гэж үзсэнтэй холбоотой гэдгийг мөн онцлон дурдсан байна.

Эх сурвалж: УИХ