Монгол Улсын Гадаад харилцааны сайд Б.Батцэцэгийг үүрэгт ажилдаа улиран томилогдсонд Япон Улсын Гадаад хэргийн сайд Такэши Иваяа баяр хүргэж, албан захидал илгээжээ. Энэхүү захидалд хоёр орны найрсаг харилцаа, хамтын ажиллагааны чухал үе шат эхэлж буйг онцлон тэмдэглэсэн байна.
Сайд Иваяа захидалдаа, “Монгол Улсын Гадаад харилцааны сайдаар дахин томилогдсонд чин сэтгэлийн баяр хүргэе. Таны Япон Улсад хийсэн албан ёсны айлчлалын үеэр үр дүнтэй санал солилцсон нь хоёр орны хамтын ажиллагаанд чухал түлхэц өгсөн” хэмээн бичжээ. Мөн тэрбээр Монгол, Японы хоорондын “Энх тайван, хөгжил цэцэглэлтийн төлөөх тусгай стратегийн түншлэл”-ийн 2022-2031 оны үйл ажиллагааны хөтөлбөрийг тууштай хэрэгжүүлэхийн төлөө хамтран ажиллахдаа баяртай байгаагаа илэрхийлсэн байна.
Түүнчлэн, 2024 оны долоодугаар сард Япон Улсын Цог Жавхлант Эзэн Хаан, Эрхэм дээд Хатан нар Монгол Улсад төрийн айлчлал хийхээр төлөвлөж буйг дурдаад, энэхүү айлчлал нь хоёр орны найрамдал, нөхөрлөлийг улам бататгах түүхэн үйл явдал болно гэдэгт итгэж буйгаа онцолжээ.
Захидлын төгсгөлд Японы талаас Монгол Улсын хөгжил цэцэглэлтийг ерөөж, Гадаад харилцааны сайд Б.Батцэцэгт эрүүл энх, аз жаргалыг хүсэн ерөөсөн байна.
Эх сурвалж: Гадаад харилцааны яам, Япон Улсын Гадаад хэргийн яам.
