Өнөөдөр буюу 2025 оны зургадугаар сарын 24-ний өдөр Монгол Улсын Их Хурал дахь гурван ажлын хэсэг дараах асуудлуудаар хуралдахаар товлогдлоо.
Эхнийх нь Инновац, цахим бодлогын байнгын хорооны дэргэд байгуулагдсан ажлын хэсэг бөгөөд хилийн чанад дахь Монгол Улсын иргэдэд төрийн үйлчилгээний нэгдсэн И-Монгол системийг илүү хүртээмжтэй болгох, мөн тэдгээр иргэд сонгуульд цахимаар оролцох боломжтой байх нөхцөл бүрдүүлэх талаар хэлэлцэнэ. Уг хуралдаан 10:00 цагт 334 тоот танхимд эхэлнэ.
Хоёр дахь хуралдаан нь Эдийн засгийн байнгын хорооны харьяа бөгөөд “Стандартчилал, техникийн зохицуулалт, тохирлын үнэлгээний итгэмжлэлийн тухай хууль”-ийн шинэчилсэн найруулга болон түүнтэй хамт өргөн мэдүүлсэн бусад хуулийн төслийг хэлэлцүүлэгт бэлтгэхээр товлогдсон. Уг хуралдаан 13:30 цагт “Их засаг” танхимд болно.
Гурав дахь хуралдаан нь Хууль зүйн байнгын хорооны харьяа ажлын хэсгийнх бөгөөд “Хууль тогтоомжийн тухай хуульд нэмэлт, өөрчлөлт оруулах тухай” хуулийн төсөл болон холбогдох бусад төслүүдийг хэлэлцүүлэгт бэлтгэхээр хуралдах юм. Энэ хуралдаан 14:30 цагт мөн 334 тоот танхимд зохион байгуулагдана.
Эх сурвалж: Монгол Улсын Их Хурлын Тамгын газар
