Хөгжлийн бэрхшээлтэй иргэдийн орчны хүртээмжийг сайжруулах томоохон зорилгоор “Гэрээсээ гарцгаая” нэртэй аяныг эхлүүлсэн байна. Энэхүү аяны хүрээнд УИХ-ын гишүүн О.Саранчулуун, Ж.Баясгалан, нийслэлийн Засаг дарга бөгөөд Улаанбаатар хотын Захирагч Х.Нямбаатар болон холбогдох албаны хүмүүс нийслэлийн нөхцөл байдалтай биечлэн танилцлаа. Аяны багийнхан нийслэлийн авто болон явган хүний зам, нийтийн тээвэр, нүхэн гарц, барилга, байшингийн орц, гарцаар хөгжлийн бэрхшээлтэй иргэд зорчиход ямар хүндрэл тулгардаг болохыг газар дээр нь судалж, тэдгээрийг хэрхэн шийдвэрлэх талаар зөвшилцсөн юм.

Хотын дарга Х.Нямбаатар энэ үеэр хэлэхдээ, "Аяны хүрээнд хоёр цаг гаруй хугацаанд нийтийн эзэмшлийн гудамж, зам, талбай, нийтийн унаа, барилга, байшингуудын орц, гарцаар тэргэнцэртэй иргэний хувиар түрж явсны хувьд хүртээмжийг сайжруулахад дутагдалтай зүйлс нэлээд байгааг ажиглалаа. Тухайлбал, Багшийн дээдийн нүхэн гарцаар тэргэнцэртэй иргэн зорчиход хүндрэлтэй байна. Мөн зарим хэсэгт явган хүний болон авто замын огтлолцол нь өндөр, намын зөрүүтэйгээс зорчиход саад учруулж байна. Тиймээс нийслэлээс одоогийн бодлого, төлөвлөлттэйгөө эдгээр ажлыг уялдуулж, явган хүний замыг нэг стандарттай болгох, үйлчилгээний газруудын орц, гарцыг чанаржуулахад онцгой анхаарна" гэсэн юм. Тэрбээр үргэлжлүүлэн "Мөн нийслэлийн Нийтийн тээврийн бодлогын газарт хөгжлийн бэрхшээлтэй иргэдийг хүндрэл, саадгүй зорчуулахад чиглэл өгөөд зогсохгүй жолооч нарыг сургалтад хамруулах ажлыг эрчимжүүлнэ. Эхний ээлжид Багшийн дээдийн нүхэн гарцыг иж бүрэн шинэчилнэ" хэмээн амласан байна.

“Гэрээсээ гарцгаая” аяны хүрээнд эхний ээлжид нутгийн удирдлагын байгууллагуудын оролцоог сайжруулахын тулд 32 шалгуур үзүүлэлт бүхий 13 бүлэг төлөвлөгөөг тусгасан номыг хөгжлийн бэрхшээлтэй иргэдийн амьдрах орчныг дээшлүүлэх, хүний эрхийг хангах чиглэлээр гаргаж боловсруулжээ. Энэхүү төлөвлөгөөг нутгийн удирдлагын байгууллагын Засаг дарга нарын эрх, үүргийн хүрээнд хэрэгжүүлж чадвал гурван жилийн дараа гэхэд Монгол Улс олон улсын хүний эрхийн хорооноос гаргадаг НҮБ-ын Хөгжлийн бэрхшээлтэй хүмүүсийн эрхийн тухай конвенцын хэрэгжилтийг 80 хувиар нэмэгдүүлэх боломжтой юм. Цаашид тус аяныг орон даяар хэрэгжүүлж, Монгол Улсын хөгжлийн бэрхшээлтэй иргэдийн амьдрах орчин, нийгмийн оролцоог дээшлүүлэхээр зорьж байна.