Монгол Улсын Засгийн газрын шинэ бүрэлдэхүүн бүрэн эрхээ хэрэгжүүлж эхэллээ
Улаанбаатар, 2025 оны зургаадугаар сарын 18 /МОНЦАМЭ/. Монгол Улсын Их Хурлын чуулганы өнөөдрийн хуралдаанаар Ерөнхий сайд Г.Занданшатар Засгийн газрын гишүүдэд нэр дэвшигчдийг танилцуулж, шинэ Засгийн газар бүрэн бүрэлдэхүүнээрээ үүрэгт ажилдаа орлоо.
Ерөнхий сайд Г.Занданшатар Үндсэн хуулийн Гучин есдүгээр зүйлийн 4 дэх хэсэгт заасны дагуу Засгийн газрын гишүүдийг Улсын Их Хуралд танилцуулж байгаагаа онцолсон юм. Тэрээр Засгийн газрын бүрэлдэхүүнд дараах нэр дэвшигчдийг танилцууллаа:
- Тэргүүн Шадар сайд бөгөөд Эдийн засаг, хөгжлийн сайдад Ням-Осорын Учрал
- Шадар сайдад Тогмидын Доржханд
- Шадар сайдад Сайнбуянгийн Амарсайхан
- Засгийн газрын Хэрэг эрхлэх газрын даргад Сандагийн Бямбацогт
- Гадаад харилцааны сайдад Батмөнхийн Батцэцэг
- Сангийн сайдад Болдын Жавхлан
- Хууль зүй, дотоод хэргийн сайдад Лхагвын Мөнхбаатар
- Аж үйлдвэр, эрдэс баялгийн сайдад Гонгорын Дамдиннням
- Батлан хамгаалахын сайдад Дамбын Батлут
- Байгаль орчин, уур амьсгалын өөрчлөлтийн сайдад Батын Батбаатар
- Боловсролын сайдад Пүрэвсүрэнгийн Наранбаяр
- Гэр бүл, хөдөлмөр, нийгмийн хамгааллын сайдад Тилеуханы Аубакир
- Зам, тээврийн сайдад Борхүүгийн Дэлгэрсайхан
- Соёл, спорт, аялал жуулчлал, залуучуудын сайдад Чинбатын Ундрам
- Хот байгуулалт, барилга, орон сууцжуулалтын сайдад Энхтайваны Бат-Амгалан
- Хүнс, хөдөө аж ахуй, хөнгөн үйлдвэрийн сайдад Жадамбын Энхбаяр
- Цахим хөгжил, инновац, харилцаа холбооны сайдад Энхбаярын Батшугар
- Эрчим хүчний сайдад Баттогтохын Чойжилсүрэн
- Эрүүл мэндийн сайдад Жигжидсүрэнгийн Чинбүрэн
Ерөнхий сайд мөн Хяналт, үнэлгээний Үндэсний хорооны дарга, Боомтын сэргэлтийн Үндэсний хорооны дарга, 20 минутын хот Үндэсний хорооны дарга нарын эрхлэх асуудлыг Засгийн газрын сайд нар давхар хариуцан гүйцэтгэх боломжтой хэмээн үзсэн байна. Танилцуулгатай холбогдуулан УИХ-ын гишүүд Ерөнхий сайд болон нэр дэвшигчдээс асуулт асууж, тайлбар, мэдээлэл авлаа.
Монгол Улсын Их Хурлын чуулганы хуралдааны дэгийн тухай хуульд заасны дагуу Засгийн газрын гишүүнийг УИХ-д танилцуулсанд тооцох бөгөөд УИХ-аас аливаа шийдвэр гаргахгүй тул УИХ-ын гишүүд Ерөнхий сайдын танилцуулгыг сонсох үйл явц үүгээр өндөрлөсөн юм.
Үүний дараа Ерөнхий сайд Засгийн газрын гишүүдэд захирамжаа гардуулсны дараа чуулганы хуралдааныг 30 минут завсарлуулав. Завсарлагааны дараа Засгийн газрын гишүүд УИХ-д тангараг өргөж, Төрийн далбаанаас адис авч, тангаргийн бичигт гарын үсэг зурснаар Засгийн газрын шинэ бүрэлдэхүүн албан ёсоор үүрэгт ажилдаа орлоо.
