Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар, Их Британи, Умард Ирландын Нэгдсэн Хаант Улсаас Монгол Улсад суугаа Элчин сайд Фиона Блайт нар эрдэс баялгийн салбарын хамтын ажиллагааны хүрээнд замын зураглалд гарын үсэг зурлаа. Энэхүү баримт бичиг нь хоёр улсын хамтын ажиллагааг илүү системтэй, тодорхой чиглэлтэй болгох анхны алхам болж байна.

Хамтын ажиллагааны хүрээнд геологийн салбарт түлхүү анхаарч, бүс нутгийн геофизик, геохимийн болон геологийн зураглалын ажлыг хамтран гүйцэтгэхээр төлөвлөжээ. Энэ үед орчин үеийн дэвшилтэт технологи, инновац ашиглаж, судалгааны нарийвчлал, чанарыг дээшлүүлэх нь гол зорилго болж байна.

Мөн ашигт малтмалын чиглэлээр хоёр тал сургалт, семинар зохион байгуулах, олон улсын тэргүүний туршлага нэвтрүүлэх замаар боловсон хүчний чадавхыг нэмэгдүүлэх, салбарын хөгжилд бодит дэмжлэг үзүүлэхээр тохиролцсон байна.

Энэхүү хамтын ажиллагаа нь Монгол Улсын геологи, уул уурхайн салбарт шинэ шатны хөгжил авчрах, гадаадын хөрөнгө оруулалтыг татах, ил тод байдлыг хангах нөхцөлийг бүрдүүлэхэд чухал нөлөө үзүүлнэ гэж талууд үзэж байна.

Эх сурвалж: Аж үйлдвэр, эрдэс баялгийн яам