Чингэлтэй, Сүхбаатар дүүргийн 158 га газрыг хамрах анхны жишиг “20 минутын хот” буюу Сэлбэ хотын бүтээн байгуулалтын эхний ээлжийн хоёр багц тендерийн гүйцэтгэгч тодорч, 4400 айлын орон сууц барих ажил албан ёсоор эхэллээ. Уг төсөл нь нийслэлийн иргэдийн амьдралын чанарыг сайжруулах, хотын төвлөрлийг сааруулах, агаарын бохирдлыг бууруулах зорилготой бөгөөд Улаанбаатар хотод ийм хэмжээний газар чөлөөлж, иж бүрэн хот төлөвлөх анхны тохиолдол болж байна.

Нийслэлийн Засаг даргын нэгдүгээр орлогч Т.Даваадалай болон холбогдох албаныхан төслийн талбайд ажиллаж, иргэдтэй харилцаж буй байдлыг шалгасан байна. Газрын маргаантай болон бүртгэлийн зөрчилтэй 200 гаруй айлын асуудал үлдээд байгаа ч нийт газар чөлөөлөлт 90 гаруй хувийн гүйцэтгэлтэй үргэлжилж байгаа аж. Эдгээр зөрчлүүд нь ихэвчлэн өмчлөлийн маргаан, улсын бүртгэлийн баримт бичиг дутмаг зэрэгтэй холбоотой байна.

Төсөл хэрэгжих хугацаанд иргэдтэй тогтвортой холбоо тогтоож, мэдээллээр хангах зорилгоор “Иргэдийг сонсох төв”-ийг НЕБ-ын 35 дугаар сургуулийн дэргэд байгуулжээ. Нийслэлийн Газар зохион байгуулалтын албанаас төсөлд хамрагдаж буй нийт 158 га талбайг зургаан хэсэгт хуваан, тус бүрт нэг албан хаагч томилж, иргэдтэй шууд харилцах хэлбэрээр зохион байгуулалтаа хийж байна.

Хотын эрх баригчид “газрын 70 хувиас дээш хувь нь чөлөөлөгдвөл бүтээн байгуулалтыг эхлүүлэх боломжтой” гэсэн хууль эрх зүйн үндэслэлд тулгуурлан ажиллаж байгаа ч, 100 хувийн дэмжлэгийг иргэдээс авахын төлөө нийгмийн оролцоог дэмжин ажиллаж буйгаа онцолжээ. НЗД-ын нэгдүгээр орлогч Т.Даваадалай “Сэлбэ хот” нь нийтийн эрх ашгийг дээдэлсэн, төр хувийн хэвшлийн түншлэлд суурилсан загвар хот болохыг тэмдэглэж, иргэд, ААН-үүдийг санал, оролцоогоо илэрхийлэхийг уриалсан байна.

Сэлбэ хотын бүтээн байгуулалт 26 багц ажилд хуваагдаж, одоогоор геодезийн суурь цэгүүдийг тогтоох, мэдээлэл харилцааны сүлжээг бүрдүүлэх зэрэг ажлууд эхэлсэн бөгөөд эхний хоёр багц нь газар чөлөөлөлтийн хувьд хамгийн бага асуудалтай хэмээн “Сэлбэ 20 минутын хот” корпорац ХХК-ийн төслийн менежер Г.Ууганбаяр мэдэгдлээ.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс