Улсын Их Хурлын 2025 оны тавдугаар сарын 29-ний өдрийн үдээс хойших чуулганы нэгдсэн хуралдаанаар Зөвшөөрлийн тухай хуульд нэмэлт, өөрчлөлт оруулах тухай болон хамт өргөн мэдүүлсэн хуулийн төслүүдийн эцсийн хэлэлцүүлгийг хийв.

Эдийн засгийн байнгын хорооны танилцуулгыг УИХ-ын гишүүн О.Батнайрамдал танилцуулж, хуулийн төслүүдийн найруулга, нэр томьёоны уялдаа, хууль зүйн техникийн засварыг хийж, эцсийн хувилбарыг бүрдүүлсэн талаар мэдээллээ. Ялангуяа Эрүүгийн тухай хуульд нэмэлт оруулах төсөлтэй холбогдуулан 20.18, 20.19 дүгээр зүйлд нэр томьёоны болон найруулгын саналаар дахин санал хураалт явуулахыг санал болгож, гишүүдийн 2/3 нь дэмжсэн байна.

Хэлэлцүүлгийн үеэр УИХ-ын гишүүд, тэр дундаа Д.Пүрэвдаваа, О.Номинчимэг нар цахим мөрийтэй тоглоомын хор хохирол, техник технологийн хориглох боломж, хууль бус гүйлгээний хяналт, хуулийн хэрэгжилтийн нөхцөл бололцооны талаар тодруулж, хууль боловсруулах ажлыг нарийн мэргэжлийн түвшинд хийхийг онцлон зөвлөв.

Чуулганы үргэлжлэлд Байнгын хорооноос гаргасан зарчмын зөрүүтэй хоёр саналаар санал хураалт явуулж, хуралдаанд оролцсон гишүүдийн олонх дэмжсэн тул хуулийн төслүүдийг эцэслэн батлах бэлтгэлийг хангах үүрэгтэйгээр Эдийн засгийн байнгын хороонд шилжүүлсэн тухай Улсын Их Хурлын Хэвлэл мэдээллийн газар мэдээлжээ.

Ийнхүү Зөвшөөрлийн тухай хуульд оруулах нэмэлт, өөрчлөлт болон түүнийг дагалдсан хууль эрх зүйн төслүүд эцсийн хэлэлцүүлгийн шатандаа орж, батлагдах шатандаа шилжлээ.

Эх сурвалж: Улсын Их Хурлын Хэвлэл мэдээллийн алба