УИХ-ын Нийгмийн бодлогын байнгын хорооны дарга Л.Энхнасан өнөөдөр Их Британи, Умард Ирландын Нэгдсэн Хаант Улсаас Монгол Улсад суугаа Элчин сайд Фиона Блайтыг хүлээн авч уулзлаа.

Уулзалтын үеэр Л.Энхнасан хоёр орны найрсаг харилцаа бүхий л салбарт амжилттай хөгжиж буйг онцлоод, хөдөлмөр эрхлэлтийг дэмжих, эрүүл мэнд, нийгмийн хамгааллын тогтолцоог сайжруулах бодлогын хэрэгжилтэд байнгын хороо онцгойлон анхаарч ажиллаж байгааг танилцууллаа. Тэрээр эрүүл мэндийн салбарт гүйцэтгэлийн санхүүжилтийн тогтолцоог боловсронгуй болгох, урьдчилан сэргийлэх тусламж үйлчилгээг өргөжүүлэх, сэтгэл зүй, сэтгэцийн эрүүл мэндийг хамгаалах, яаралтай тусламжийн хүртээмжийг нэмэгдүүлэх, ялангуяа эрэгтэйчүүдийн эрүүл мэнд, боловсролд чиглэсэн бодлогыг илүү түлхүү хэрэгжүүлж байгааг онцлон тэмдэглэв.

Түүнчлэн Л.Энхнасан Их Британийн энэ чиглэлээр хэрэгжүүлсэн сайн туршлагуудыг судалж, харилцан суралцах замаар Монголд нэвтрүүлэх сонирхолтой байгаагаа илэрхийлсэн юм.

Элчин сайд Фиона Блайт парламент хоорондын харилцаа нь хоёр орны хамтын ажиллагаанд чухал суурь болж байгааг онцлоод, хамтын ажиллагааны цар хүрээг өргөжүүлж, олон улсын түвшинд ч харилцан уялдаатай ажиллахыг дэмжин ажиллахаа илэрхийллээ.

Эх сурвалж: УИХ-ын Хэвлэл мэдээллийн газар