Нийслэлийн Засаг даргын Тамгын газар нийслэлийн өмчид бүртгэлтэй боловч иргэн Ж.Хатанбаатар нарын хууль бусаар ашиглаж байсан эмийн үйлдвэрийн газрыг буцаан авч, 2025 оны тавдугаар сарын 22-нд дуудлага худалдаагаар амжилттай борлууллаа.
Нийт 3150 ам.метр талбай бүхий уг газрыг 443 сая 520 мянган төгрөгөөс үнэ дуудаж эхэлсэн бөгөөд “Эхлэл брэнд” ХХК 9 тэрбум 323 сая 520 мянган төгрөгөөр худалдан авсан байна.
Нийслэлийн удирдлагууд энэхүү дуудлага худалдаанаас олсон орлогыг барилгын ажил нь санхүүжилт болон бусад шалтгаанаар олон жил гацсан сургууль, цэцэрлэгүүдийг бүрэн ашиглалтад оруулахад зориулах зорилготой байгаагаа мэдэгдсэн юм.
Цаашид нийслэл өмчийн менежментийг сайжруулах, өмнө нь алдагдсан өмч хөрөнгийг эргүүлэн авч нөхөн сэргээх, зориулалтын дагуу ашиглах ажлыг эрчимжүүлж, заримыг нь мөн дээрх жишгийн дагуу дуудлага худалдаагаар борлуулах замаар боловсролын салбарт бодит хувь нэмэр оруулахаа онцлон тэмдэглэлээ.
Эх сурвалж: Нийслэлийн ЗДТГ
