Монгол Улсын 21 аймаг, 9 дүүргийн ИТХ-ын төлөөлөгч болон 330 сум, 9 дүүргийг төлөөлсөн нийт 800 эмэгтэй оролцсон “Бид эмэгтэйчүүд” чуулга уулзалт хоёр дахь өдрөө Төрийн ордонд үргэлжилж, улс төр, эдийн засаг, нийгмийн бүхий л салбарт эмэгтэйчүүдийн оролцоо, манлайллын талаар хэлэлцлээ.
Чуулганыг нээж УИХ-ын дэд дарга Б.Пүрэвдорж үг хэлэхдээ, улс төр дэх эмэгтэйчүүдийн оролцоог нэмэгдүүлэх чиглэлээр сонгуулийн хуулийн квотыг тусгаж, эмэгтэй нэр дэвшигчдийн тоог нэмэгдүүлэх бодлого амжилттай хэрэгжиж байгааг дурдав. Өнөөдрийн байдлаар эмэгтэй төлөөлөгчдийн тоо 2200-д хүрсэн нь өмнөхөөс 500-700-аар өссөн үзүүлэлт юм. Мөн төрийн албанд ажиллаж буй эмэгтэйчүүдийн ажил, амьдралын баталгааг сайжруулах шаардлагатайг онцоллоо.
Хүндэт зочны хувиар оролцсон Япон Улсын Ерөнхий сайд агсан Шинзо Абэгийн гэргий, Японы нийгмийн хөгжлийг дэмжих сангийн тэргүүн хатагтай Абэ Акиэ Монголд дахин ирсэндээ баяртай байгаагаа илэрхийлж, Япон-Монголын харилцаа, эмэгтэйчүүдийн манлайллыг дэмжих туршлагаа хуваалцав. Тэрбээр эмэгтэйчүүдийн оролцоо зөвхөн өөрсдийн хүчин чармайлтаар бус, эрэгтэйчүүдийн ойлголт, дэмжлэгээр илүү гүн бат үндэстэй болно хэмээн онцолж, хоёр орны хамтын ажиллагаанд итгэлтэй байгаагаа илэрхийллээ.
Чуулганы үеэр “Өсвөрийн парламент” хөтөлбөрт хамрагдсан сурагчид “Миний мөрөөдлийн сургууль” сэдвээр хамтарсан бүтээлээ танилцуулж, оролцогчдод урам зориг өгсөн бол дараа нь салбар хуралдаанууд өрнөв. Тухайлбал, “Эмэгтэйчүүдийн эдийн засгийн эрх мэдлийг тэлэх нь” сэдвээр хэлэлцүүлэг өрнөж, УИХ-ын гишүүн П.Батчимэг эмэгтэйчүүдийн “хөлсгүй” хөдөлмөр, өмч хөрөнгийн зөрүү, санхүүгийн дэмжлэгт тулгарч буй асуудлуудыг тодорхой баримттайгаар танилцуулсан юм.
Мөн гэр бүл, эрүүл мэнд, боловсролын бодлогын салбар хуралдаануудыг УИХ-ын гишүүд Д.Үүрийнтуяа, Д.Ганмаа, Ч.Ундрам нар удирдан явуулж, орон нутгийн эмэгтэй төлөөлөгчидтэй санал солилцов.
2024 оны УИХ-ын сонгуулийн үр дүнд парламентын 25.4 хувийг эмэгтэй гишүүд бүрдүүлж буй нь бүс нутагтаа тэргүүлж байгаа үзүүлэлт болж, эдийн засаг дахь оролцоог нэмэгдүүлэх, хууль эрх зүйн орчныг боловсронгуй болгоход эмэгтэй гишүүд манлайлан ажиллана гэдэгт итгэлтэй байгаагаа зохион байгуулагчид илэрхийллээ.
Эх сурвалж: УИХ-ын Хэвлэл мэдээллийн алба
