Нийслэлийн Иргэдийн төлөөлөгчдийн хурлын Эдийн засаг, төсөв, хөрөнгө оруулалтын хороо хуралдаж, нийслэлийн өмч, хөрөнгө оруулалтын чиглэлээр хэд хэдэн чухал асуудлыг хэлэлцлээ. Хуралдааныг НИТХ-ын төлөөлөгч, хорооны дарга Ж.Сандагсүрэн удирдан явуулж, хэлэлцэх асуудлыг танилцуулсан юм.

Хуралдаанаар “Нийслэлийн Орон сууцны корпорац” ХК-ийн харьяа охин компани байгуулах болон хөрөнгөөр баталгаажсан үнэт цаас гаргах асуудлыг тус байгууллагын гүйцэтгэх захирал М.Говьсайхан танилцууллаа. Уг асуудлын хүрээнд 2020 оны зургаадугаар сарын 29-нд Нийслэлийн Засаг дарга, Хөгжлийн банкны хооронд байгуулсан гэрээний хэрэгжилтийн талаар мэдээлэл өгч, “Буянт-Ухаа 2” хорооллын 972 айлын орон сууцтай холбоотой зээлийн үлдэгдлийг барагдуулах зорилгоор энэхүү алхмыг хийх шаардлагатайг тайлбарлав. Өнөөдрийн байдлаар тус зээлийн үлдэгдэл 49 тэрбум төгрөг байгаа бөгөөд үнэт цаас гаргаснаар дараах үр дүн гарах боломжтойг онцоллоо. Үүнд:

• Засгийн газрын тогтоол хэрэгжинэ

• Хөгжлийн банкны зээл төлөгдөнө

• Иргэд төлбөрөө сунгасан хугацаанд хийх боломжтой болно

• Үл хөдлөх хөрөнгийн гэрчилгээ иргэдийн нэр дээр гарна

• Ажлын орон тоо шинээр нэмэгдэхгүй, зөвхөн үнэт цаасны чиглэлээр ажиллана

Харин хорооны гишүүд болох Т.Отгонболд, Ч.Батзориг, Э.Энхтөр, Д.Бадарсан, Ж.Энхжаргалан нар заавал охин компани байгуулах шаардлагагүй, НОСК өөрийн бүтцийн хүрээнд үнэт цаас гаргаж болох талаар саналаа хэлж, хяналт хэн тавих нь тодорхой байх ёстойг онцолсон байна.

Мөн хуралдаанаар дараах асуудлуудыг хэлэлцэв:

• “АНУ Сервис” ХХК-ийн менежментийн гэрээгээр ажиллаж буй гурван халаалтын зуухыг нийслэлийн өмчийн бүртгэлээс хасах

• Шинээр ашиглалтад орсон 343, 267, 201, 6 дугаар цэцэрлэгийн барилгыг нийслэлийн өмчид бүртгэх

• Нийслэлийн өмч хувьчлалын жагсаалтаас нэг барилга хасах

• Актлагдсан барилга байгууламжийг өмчийн бүртгэлээс хасах

Эдгээр асуудлыг НИТХ-ын ээлжит бус VI хуралдаанаар хэлэлцүүлэхийг хорооны гишүүд дэмжсэн байна.

Эх сурвалж: НИТХ