Монгол Улсын Сангийн сайд Б.Жавхлан өнөөдөр УИХ-ын дарга Д.Амарбаясгаланд Монгол Улс болон Олон улсын сэргээн босголт, хөгжлийн банк (ОУСБХБ) хоорондын Зээлийн хэлэлцээрийг соёрхон батлах тухай хуулийн төслийг өргөн барилаа гэж УИХ-ын Хэвлэл мэдээллийн газраас мэдээлэв.

Уг зээлийн хэлэлцээр нь “Эрчим хүч-3” төсөл-ийн хүрээнд хэрэгжих бөгөөд төслийн гол зорилго нь:

• Багануур–Чойр чиглэлийн 110 кВ-ын цахилгаан дамжуулах агаарын шугамыг
  220 кВ-ын хоёр хэлхээтэй болгон шинэчлэх

• Багануур, Чойр дэд станцуудыг өргөтгөх

Ийнхүү хүчин чадлыг нэмэгдүүлснээр тухайн бүс нутгийн өсөн нэмэгдэж буй эрчим хүчний хэрэглээг найдвартай, тогтвортой хангах стратегийн ач холбогдолтой гэж Сангийн сайд Б.Жавхлан онцолсон байна.

Төслийн хөрөнгийн эх үүсвэрийг ОУСБХБ-ны хөнгөлөлттэй нөхцөл бүхий зээлийн хэлэлцээрээр бүрдүүлэх бөгөөд хуулийн төслийг УИХ-аар соёрхон баталсны дараа төслийг хэрэгжүүлж эхэлнэ.

Эх сурвалж: УИХ-ын Хэвлэл мэдээллийн алба