Нийслэлийн зүгээс ашиглалтын шаардлага хангахгүй гэсэн дүгнэлт гарсан, иргэдийн амьдрах нөхцөл хүнд байршлуудад дахин төлөвлөлтийн төслийг шат дараатайгаар хэрэгжүүлж байна. Энэ хүрээнд “Улаанбаатар орон сууцжуулалт” ХХК нь дүүрэг, хороо харгалзахгүйгээр дахин төлөвлөлтийн төслийн оршин суугчид, өмчлөгч иргэдтэй тогтмол уулзалт хийж, санал бодлыг нь сонсож байгаа юм.

Тухайлбал, Сонгинохайрхан дүүргийн 18 дугаар хороонд байрлах СТ-4 барилгыг дахин барих төслийн хүрээнд гүйцэтгэгч компанийг сонгон шалгаруулах ажил явагдаж байна. Мөн тавдугаар сарын 14-нд Чингэлтэй дүүргийн 6 дугаар хорооны нутаг дэвсгэрт орших 44 дүгээр байрны оршин суугчидтай уулзалт зохион байгуулж, төслийн талаар дэлгэрэнгүй мэдээлэл өгчээ.

Уулзалтад нийт 106 өрхийн төлөөлөл, 22 аж ахуйн нэгжийн өмчлөгч оролцож, дахин төлөвлөлтийн явц, цаашдын төлөвлөгөө, хуваарийн талаар мэдээлэл сонсон, санал солилцсон байна. Тус байр нь анх 1960 онд ашиглалтад орсон бөгөөд 2012 онд мэргэжлийн байгууллагын зүгээс ашиглалтын шаардлага хангахгүй гэсэн дүгнэлт гарсан байдаг.

Иргэдийн зүгээс энэхүү олон жил гацсан төсөл хөдөлгөөнд орж буйд талархаж байгаагаа илэрхийлсэн хэдий ч улс төрийн нөхцөл байдлаас шалтгаалж дахин хойшлох вий гэдэгт санаа зовниж байгаагаа ч хэлсэн. Түүнчлэн төслийг хэрэгжүүлэх явцад иргэдийн эрх ашиг, амьдрах орчинд нөлөөлөх асуудлыг анхаарч, хяналттай хэрэгжүүлэхийг холбогдох байгууллагуудаас хүслээ.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс