УИХ-ын Эдийн засгийн байнгын хорооны өнөөдрийн /2025.05.14/-ийн хуралдаанаар “Монгол Улсын хөгжлийн 2026 оны төлөвлөгөө батлах тухай” УИХ-ын тогтоолын төслийн эхний хэлэлцүүлгийг хийлээ. Байнгын хорооны гишүүдийн олонхийн саналаар тогтоолын төслийг дэмжсэн байна. 

Монгол Улсын хөгжлийн 2026 оны төлөвлөгөө нь

• “Бүсчилсэн хөгжлийн бодлого”,
• “Хүний хөгжлийн бодлого”,
• “Эдийн засгийн бодлого”,
• “Хүний эрхийг дээдэлсэн засаглалын бодлого” гэсэн дөрвөн бодлогын тэргүүлэх чиглэлтэй. 

2026 онд баримтлах бодлогын тэргүүлэх чиглэл нь “Хүн төвтэй” хөгжлийн үзэл санаанд нийцсэн “Эдийн засгийн эрх чөлөөг цогцлоох”-ыг зорьж төсвийн зардлын реформ, төрийн албаны реформ, үндэсний баялгийн сан, төрийн өмчит компанийн засаглалын реформыг хэрэгжүүлэх бөгөөд тус реформууд нь ядуурлыг бууруулахад чиглэх юм. 

Мөн 2026 онд нэн шаардлагатай салбарын реформ, тэргүүлэх ач холбогдолтой хөгжлийн 14 мега төслийг эрчимжүүлж, макро эдийн засгийн тогтвортой өсөлтийг хангаж, бизнесийн үйл ажиллагаанд оролцох төрийн оролцоог багасгах замаар ядуурлыг бууруулж, эдийн засгийн эрх чөлөөний реформыг хэрэгжүүлэхээр уг тогтоолын төсөлд тусгажээ.