"Эрдэнэс Тавантолгой" ХК-иас олон нийтийн зөвлөл байгуулах, ажлын байрны нээлттэй сонгон шалгаруулалт явуулах болон нүүрсний гэрээтэй холбоотой асуудлаар мэдээлэл хийлээ. "Эрдэнэс Тавантолгой" ХК-ийн гүйцэтгэх захирал Б.Ганхуяг "Ажлын байрны сонгон шалгаруулалтыг нээлттэй, тогтмол явуулна. Бүх сонгон шалгаруулалт ил тод явагдана. Нийгэмд үүссэн хардлагыг арилгахын тулд нээлттэй байна. Энэ бол өмнө нь хувийн өмчийн ч, төрийн байгууллагуудад ч байгаагүй жишиг" гэв.

Мөн нүүрс худалдан авагчийг нээлттэй сонгон шалгаруулж, байгууллагуудтай хийсэн гэрээг ил болгоно. Өнөөдрийг хүртэл 173 борлуулалтын гэрээ байгуулсан байдаг. Борлуулалтын гэрээг 3 хэлбэртэй болгож байгаа. Хуучин зөвхөн шууд гэрээ байгуулах хэлбэр байсан. Энэ нь хэвээрээ байна, гэхдээ улам сайжруулж байгаа.

Хоёрдугаарт худалдааны шинэ гарц бий болгоно. Ингэж байж худалдан авалт сайжирна. Гуравдугаарт нүүрс угааж, эцсийн бүтээгдэхүүн болгож, хамтран ажиллаж борлуулж байгаа. Хагас жилд 1.19 их наяд борлуулалтын орлого хийсэн. Бүтэн жилд 1.2 их наяд орлого хийх ёстой. Тэгэхээр бид аль хэдийн төлөвлөгөөгөө давуулсан. "Эрдэнэс Тавантолгой" ХК 373 тэрбум төгрөгийн цэвэр ашигтай ажилласан. Одоо ногдол ашиг 131 хувийн гүйцэтгэлтэй байна. 2018 оны төгсгөлд 1,072 хувьцааг амь оруулна. Иргэн бүрт хувьцаа тараана. Энэ онд нийт 10.5 сая тонн нүүрс борлуулах төлөвлөгөөтэй. Улсын төсөвт 216 тэрбум төгрөг төвлөрүүлсэн.

Энэ маягаар ажлууд эрчимтэй явагдаж байна. Цаашид энэ ажлуудаа улам идэвхжүүлнэ. Засгийн газраас бидэнд чиглэл өгсөн. Өнөөдөр бид 9.5 сая тонн нүүрс борлуулаад байна. Бид дахиад 4 сая тонн нүүрс борлуулах хэрэгтэй байна. Өнөөдрийн байдлаар 9 сая тонн нүүрс олборлосон байна. Компани нээлттэй, ил тод болж байна гэлээ.