УИХ дахь МАН-ын бүлэг Засгийн газраас өргөн мэдүүлсэн Тавантолгой төслийг хөдөлгөх хувилбаруудтай танилцаж, хоёр ч удаагийн хуралдаанаар нухацтай хэлэлцэв. Өчигдөр буюу даваа гаригийн бүлгийн хуралдаанаас Тавантолгойн ордын 30 хувийг бирж дээр гаргаж, олон улсын зах зээл дээрээс хөрөнгө босгох хувилбарыг дэмжжээ. Энэ чиглэлээр Засгийн газар сайтар судалж, тооцоо судалгаагаа оруулж ирэхийг бүлгийн зүгээс сануулсан байна. Ингэснээр “Эрдэнэс Тавантолгой” компани олон улсын бирж дээр нээлттэй, хувьцаат компанийн хэлбэрт шилжих юм.

Мөн өмнөх парламентын үед иргэдэд олгосон 1072 хувьцааг бүртгэлжүүлэх ажлыг Засгийн газраас хийж дууссан гэв. Иргэдийн нэр дээр шилжсэн 1072 хувьцаа “Эрдэнэс Тавантолгой” компанийн нийт хувьцааны 14-15 хувийг эзэлдэг. Анх нийт хувьцааны 20 хувийг иргэдэд тараасан боловч өмнөх хоёр удаагийн сонгуулиар Засгийн газар иргэдийн нэр дээрх хувьцааг бэлэн мөнгөөр худалдаж авсаны улмаас одоо 14-15 хувь болоод байгаа. Олон улсын зах зээл дээр нүүрсний үнэ өсөлттэй, гадаад, дотоодын хөрөнгө оруулалт сэргэж байгаа ийм цаг үед Тавантолгой ордын үйл ажиллагааг эрчимжүүлэх, нүүрсээ боловсруулах, өмнөд хөрш рүү чиглэсэн дэд бүтцийн асуудлуудыг яаралтай шийдвэрлэх шаардлага гарч байгаа. Тиймээс олон улсын  зах зээл дээрээс хөрөнгө босгох нь хувилбарыг МАН-ын бүлэг дэмжсэн байна. Харин ордын үнэлгээний асуудал уг ордод IPO хийх талаар УИХ-ын шийдвэр гарсны дараа яригдана гэв. Энэ талаар УИХ-ын гишүүн Я.Содбаатар:

-Өмнө нь Засгийн газраас 268-р тогтоол гаргаж, олон улсын Шинхуа, ММС-тэй хамтарч ажиллах асуудал яригдсан. Тавантолгой төсөлтэй холбоотой 100 гаруй шийдвэр гарсан байдаг. Энэ шийдвэрүүдийг нэгтгэж, хэрэгжилтийг цэгцлэх нэг шаардлага байна. Өнгөрсөн хугацаанд Тавантолгой орд газрын үнэлгээг хоёр удаа хийсэн байдаг. Анх 1999 онд “Би Эйч Би” гэдэг компани хийж байсан бол 2011 онд бас нэг компани үнэлсэн бөгөөд 5,7 тэрбум ам.долларын өртөгтэй байна гэсэн үнэлгээ гарч байсан. Шинэ үнэлгээгээр хэдий хэмжээний тооцоолол гаргахыг мэдэхгүй байна. Олон улсын байгууллагын үнэлгээ хийдэг компаниар хийлгэх байх. Өнөөдөр байгаа 7,2 тэрбум тоннын нөөцтэй орд газрын үнэлгээ ямар байх вэ гэдгээс шалтгаалж олон улсын хөрөнгийн бирж дээр үнэлгээ ямар байх вэ гэдэг тодорхой болно гэлээ. Үлдсэн 70 хувийг иргэд болон төр эзэмшсэн хэвээр байх аж. Иргэдийн нэр дээрх 14-15 хувийг хасвал төрийн эзэмшил 55 орчим хувь байна гэсэн үг.

Б.ЗАЯА