Өчигдөр УИХ Монгол Улсын Ерөнхий сайдаар У.Хүрэлсүхийг улираан томилов. МАН-ын Бага хурлаас 100 хувийн саналаар гарсан У.Хүрэлсүхийг УИХ 98,5 хувийн саналаар томилжээ. Санал хураалтад оролцсон 71 гишүүнээс 70 нь дэмжиж, Б.Пүрэвдорж гишүүн ганцаар эсрэг санал өгсөн байна. Өнгөрсөн хоёр жил гаруйн хугацаанд Засгийн газрыг толгойлохдоо Монгол Улсыг хар, саарал жагсаалтад оруулсны сануулга болгож...

Ерөнхий сайдыг томилох асуудал дуусахтай зэрэгцээд түүний кабинетийн гишүүдийн нэрс ч бас цацагдаж эхэллээ. Ерөнхий чиг үүргийн яам буюу Сангийн сайд, Хууль зүйн сайд нарыг, мөн Тэргүүн Шадар сайд, Засгийн газрын хэрэг эрхлэх газрын даргыг УИХ дотроос томилохоор болсон тухайн хэвлэлүүд мэдээлсэн байна. ҮХНӨ-өөр зөвшөөрсний дагуу дээрх дөрвөн сайд “давхар дээл” нөмөрнө гэсэн үг. Үлдсэн сайд нарыг парламентын гаднаас томилно гэсэн байна.

Ерөнхий сайд У.Хүрэлсүх Сангийн сайдаараа Ч.Хүрэлбаатарыг, ЗГХЭГ-ын даргаар Л.Оюун-Эрдэнийг авч үлдэхээр болсон гэх бөгөөд Хууль зүй, дотоод хэргийн сайдаар Х.Нямбаатарыг хэвлэлүүд цохсон байна. Уг мэдээлэл хэдийгээр баталгаатай биш ч бас үгүйсгэх аргагүй. Ялангуяа Х.Нямбаатарын хувьд өөрийнхөө улс төрийн карьерыг харж байгаа дараагийн цэг нь яах аргагүй Хууль зүйн сайдын суудал мөн. Харин тэр суудалдаа таарч тэнцэх үү гэдэг огт өөр асуудал.

Л.Оюун-Эрдэнийн хувьд ЗГХЭГ-ын даргад таарч тэнцэх тухай ойлголт угаасаа бодит байдлаас хэтийдсэн зүйл болсон. Өнгөрсөн хоёр жилийн хугацаанд түүний Монголын төрд учруулсан гай барцад тоолж тоймлошгүй хэдий ч У.Хүрэлсүхэд тэр бүхэн ямар хамаатай. Хажууд нь баталгаатай дэрвэж байх дарцаг л хэрэгтэй. Ерөнхий сайдынхаа боловсролгүй байдлыг ХЭГ-ын даргынх нь Харвардын диплом залруулах учиртай бололтой.

Өчигдөр болсон чуулганы хуралдаан дээр УИХ-ын гишүүд “Хуулийн салбарт эхлүүлсэн У.Хүрэлсүхийн шинэчлэл” гэх хоосон магтаалаар харамгүй булж байдаг. Ирэх дөрвөн жилд хийх юм байгаа биз л гэхээс. Хэрэв тийм бол түүнд Х.Нямбаатараас арай дөнгүүр хуульч хэрэгтэй болно. Ц.Мөнх-Оргил шиг Харвард төгссөн биш гэхэд ядаж Монголдоо тэргүүлэх зэргийн сургуульд хууль зүйн боловсрол олсон, мэргэжлээрээ ажилласан байх хэрэгтэй.

Дээр нь өнгөрсөн дөрвөн жилд парламентад суухдаа Х.Нямбаатарын хольсон, бантагнуулсан том том хуулиудыг яах вэ? Эрүүгийн хуулийн нэмэлт өөрчлөлтөд бичсэн хөөн хэлэлцэх хугацааг дампууруулж, албан тушаалтнуудын авилгын хэргийг ял, хариуцлагаас чөлөөлсөн хүн бол Х.Нямбаатар. Үүнийг би биш, нэг танхимд суусан гишүүд нь хэлж байгаа. Тийм хүнд ирэх дөрвөн жилд хууль зүйн бодлогоо даатгана гэвэл У.Хүрэлсүх лав тавьсан зорилгынхоо талд нь хүрч чадахгүй. Эрх биш үүн дээр сөрөг хүчний намууд У.Хүрэлсүхийн эсрэг зогсох байх.

Ц.Мөнх-Оргил нь гэтэл Монгол Улсыг Шанхайн хамтын ажиллагааны байгууллагад элсүүлэх У.Хүрэлсүх, Х.Баттулга нарын санаачилгыг улайран эсэргүүцсэн МАН-ын ганц хүн. Өнгөрсөн хугацаанд парламентад суухдаа ганц удаа зөв харагдуулсан харагдуулсан зүйл тэр байж ч магадгүй. Арай ч энэ удаа нэг танхимд гүйгээд орчихгүй байх.  

Өөр нэг огт нэр дурьдагдаагүй шинэ кандидат байгаа нь Хөвсгөлөөс сонгогдсон УИХ-ын гишүүн Л.Мөнхбаатар. МУИС-ийн Хууль зүйн сургуулийг төгссөн цагаасаа эхлэн Хууль зүйн яаманд мэргэжилтнээс нь эхэлж ажилласан, газар хэлтсийн даргаас аваад тус яамны харьяа 2-3 агентлагийг дамжаад, удирдаад явсан хүн. Хуулийн төсөл бичдэг мэргэжилтнээс хууль тогтоогчийн байр суурьт шилжиж, хоёр дахиа сонгогдоод байгаа, цэвэр мэргэжлээрээ ажиллаж байгаа цөөхөн боловсон хүчний нэг. Өнгөрсөн дөрвөн жилд парламентад суухдаа ядаж л Х.Нямбаатар шиг ЖДҮ аваагүй, хувьдаа барилга байшин бариулаагүй, элдэв хэл аманд орооцолдоогүй нэр цэвэр эрхмүүдийн нэг. Хөвсгөлийн гэдэг утгаараа Ц.Даш-Ёндон, С.Баяр нартай ойр байсан гэхээс өөрөөр бол өө сэвгүй.

Б.СЭМҮҮН