1072 хувьцаа болон Эрдэнэс Тавантолгой ХК-тай холбоотой цаг үеийн асуудлаар тус компанийн Хэвлэл мэдээлэл, олон нийттэй харилцах хэлтсийн дарга М.Амарбаяр мэдээлэл хийв.

Өнөөдрийн байдлаар хувьцааны дансаа нээлгэсэн 1 сая 850 мянган иргэн, нээлгээгүй 700 мянган иргэн байна. Хувьцааны дансаа нээлгэсэн иргэдийн 300 мянга нь ногдол ашгаа хүлээн авах банкны дансаа мэдүүлсэн бол үлдсэн 1 сая 500 мянга гаруй иргэн банкны дансаа мэдүүлээгүй байна.

Хувьцааны дансаа нээлгэсэн ч банкны дансаа мэдүүлээгүй иргэдийн ногдол ашгийг "ebarimt" аппликейшнд холбоотой дансаар олгох чиглэлээр Сангийн яаманд хандаад байгааг тус компаниас мэдээлэв. 

Түүнчлэн 2010-2011, 2011-2012 онуудад оюутны сургалтын төлбөр, 2011 онд эрүүл мэндийн даатгалын шимтгэл хэлбэрээр хишиг хувь хүртэж хувьцаанаас хасаж тооцуулахаар иргэдийн гаргасан өргөдөл, хүсэлт зэрэг анхан шатны баримтыг цахимжуулах ажлыг эхлүүлжээ. Иргэдийн хувьцааны тоо хэмжээний өөрчлөлтийг холбогдох хууль тогтоомж, анхан шатны баримтад тулгуурлан хянаж нягтлан бүртгэлийг тулгах, цахимжуулах чиглэлээр Нийслэлийн Багануур, Баянзүрх, Баянгол, Сүхбаатар, Сонгинохайрхан, Чингэлтэй, Хан-Уул дүүргийн Хөдөлмөр, халамж үйлчилгээний хэлтсүүдэд Эрдэнэс Тавантолгой компанийн ажилтнууд ажиллаж байна гэв. 

Уурхайн үйл ажиллагаа хэвийн явагдаж байна

Өнгөрсөн  долоо хоногт Эрдэнэс-Тавантолгой ХК 47.6 мянган тонн нүүрс олборлож, 309 тэвшээр 23.7 мянган тонн нүүрс ачиж, 302 тэвшээр 39.2 мянган тонн нүүрс экспортолжээ. Он гарсаар 2.3 сая тонн нүүрс олборлож, 2.1 сая тонны нүүрс уурхайгаас ачиж, 853.4 мянган тонн нүүрс экспортлоод байна.

Тус компанийн охин компани “Эрдэнэс-Тавантолгой Майнинг” компанийн туслан гүйцэтгэгч “Ти Ти Жи Ви Си Өү” ХХК шинээр байгуулагдсан үйлдвэрчний эвлэлийн тэргүүлэгчээр сонгогдсон 10 ажилтнаа халж, Эрдэнэс-Тавантолгой ХК-ийн 9 ажилтныг өөрийн техник дээр ажиллахгүй байх шийдвэр гаргаснаас үүдэн Эрдэнэс Тавантолгой ХК-ийн уурхайн ажилчид ээлжинд гарч, буухдаа жагсаал хийх хэлбэрээр эсэргүүцлээ илэрхийлж байгаа аж.  “Ти Ти Жи Ви Си Өү” ХК 48 цагийн сул зогсолт хийснийг эс тооцвол уурхайн ажил хэвийн явагдаж байна. 

Эрдэнэс-Тавантолгой ХК-ийн зүгээс “Ти Ти Жи Ви Си Өү” ХХК болон “Эрдэнэс-Тавантолгой Майнинг” компанид албан бичиг хүргүүлж, ажил үүргээ хэвийн гүйцэтгэх, уурхай дээр үүссэн нөхцөл байдлыг хэвийн болгохыг шаардсан. Мөн УУХҮ-ийн сайдаас өгсөн чиглэлийн дагуу халагдсан ажилтнуудыг ажилд авах, техник дээр нь гарч байсан ажилтнуудыг өөр ажлаар хангах зэргээр уурхайчдын ажлын байрыг хадгалах, ажилтай орлоготой үлдээхэд анхаарч байна гэлээ.

Худалдан авалтын үйл ажиллагаатай холбоотой ташаа мэдээлэл цацагдаж байна

Компанийн худалдан авалттай холбоотой ташаа мэдээлэл олон нийтийн сүлжээнд цацах явдал гарсаар байна. Тухайлбал, “Гүйцэтгэх захирал Б.Ганхуяг ганцаараа 15 тэрбум төгрөгийн тендерийн асуудлыг шийдвэрлэж байна” гэсэн утгатай зүйлийг зарим иргэн фейсбүүк хуудсаараа цацсан. Энэхүү мэдээнд дурдагдсан уурхайн ажилчдын хотхоны тендер гэхэд 1 дүгээр сарын 31-нд материал хүлээж авсан. 2-р сарын 4-ний өдөр ажлын хэсэг дүгнэлтээ гаргасан байна. Харин уурхайн захиргааны барилгын барилга угсралтын тендерт эхний удаа оролцсон компаниуд  бүгд тэнцээгүй тул хоёр дахиа явагдаж, өнгөрсөн оны 12-р сарын 25-нд шийдвэр нь гарсан. Тиймээс цаг хугацааны хувьд ч Гүйцэтгэх захирал ганцаараа шийдэж байна гэдэг худлаа мэдээлэл. Мөн аливаа худалдан авалт төсвийн болон орон нутгийн хөрөнгөөр бараа ажил үйлчилгээ худалдан авах хуулийн дагуу явагддаг, ганц хүн биш үнэлгээний хороо энэхүү шалгаруулалтыг хуулийн дагуу хийдэг, үнэлгээний хороонд хөндлөнгийн гишүүд оролцдог гэдгийг мэдэгдэж байна гэв.