Монголбанкны мөнгөний бодлогын хороо өнөөдөр /2020.04.13/ хуралдаж, хэрэглээний зээлийн эргэн төлөлтийн хугацааг сунгах шийдвэр гаргажээ. Эргэн төлөлт нь доголдсон зээлдэгчдийн хэрэглээний зээлийг 12 хүртэлх сараар сунгаахаар болсон байна. 

Ингэхдээ зээлийн эргэн төлөлтөө сунгах хүсэлтэй иргэд 2020 оны долдугаар сарын 31-ний дотор зээл авсан арилжааны банкандаа хүсэлтээ гаргаж, зээлийн эргэн төлөлтийн хуваариа шинэчлэх юм. Зээл төлөх хувиараа шинэчилснээр чанаргүй зээлийн ангилалд орохгүй. Эргэн төлөлтийг сунгаж байгаа хэрэглээний зээлийн төрөлд арилжааны банкнаас авсан тэтгэврийн зээлээс бусад зээл хамаарах аж. 

Мөн өнөөдөр Монголбанкны ерөнхийлөгчийн тушаал гарч, шинээр олгох зээлийн өр орлогын харьцааг тооцох аргачлалд өөрчлөлт оруулжээ. Өмнө нь хэрэглээний зээл олгохдоо тухайн зээл хүссэн иргэний орлогыг харгалздаг байсан бол одооноос өрхийн бусад гишүүний орлогыг тооцдог аргачлалыг эхлүүлэх юм байна. 

Энэ тухай Мөнгөний бодлогын газрын захирал Б.Баярдаваа:

-"Хэрэглээний зээлийн хугацааг 12 сараар сунгаж буй энэ үйл явц аль хэдийнээ хэрэглэгчдийн гарт очсон зээлүүд буюу эргэн төлөлт нь хүндрээд, доголдол үүсээд буй зээлүүдийн хугацааг сунгах шийдвэр юм.  Хэрэглээний зээл гэдэгт тэтгэврийн зээлээс бусад арилжааны банкнаас олгож байгаа хэрэглээний шинж чанартай зээлүүд бүгд орно. 

Шинээр олгож байгаа зээлийн хувьд 30 сар, 60 хувийн өр, орлогын харилцааны шийдвэрүүд мөрдөгдөнө. Зээлийн өр, орлогын харцааг тооцох аргачлал нь хэрэглээний зээлийн хүрээнд өөрчилж буй хоёр дахь арга хэмжээ юм. Хэрэглээний зээлийн шинэ аргачлал батлагдаж, арилжааны банкуудад хүргэгдэнэ. Энэ аргачлал дээр ямар төрлийн зээлүүд хамрагдах вэ гэдгийг нь тодорхой зааж өгсөн.

Хоёрдугаар сарын байдлаар зээлийн өсөлтийг ангиллаар нь авч үзвэл бизнесийн зээлийн жилийн өсөлт 9.6 хувьтай байна" гэв.