Гадаад харилцааны сайд Д.Цогтбаатар шинээр томилогдон ирсэн Итали Улсын Элчин сайд Лаура Боттатай Монгол, Италийн харилцаа, хамтын ажиллагааг хөгжүүлэхэд хамтран ажиллахаар болсонд баяртай байгаагаа илэрхийлж, Монгол Улсын Засгийн газраас баримталж буй бодлого, тэргүүлэх чиглэл, гадаад худалдааны өнөөгийн байдлын талаар танилцуулав.
Хоёр улсын харилцаа, хамтын ажиллагааг эдийн засгийн агуулгаар баяжуулах, Монголын арьс, шир, ноос, ноолуурыг Италийн өндөр технологитой хослуулан нэмүү өртөг шингэсэн бүтээгдэхүүн боловсруулж, гуравдагч зах зээлд гаргах чиглэлээр ажиллахаар талууд тохиролцлоо.
Өнгөрсөн оны 2 дугаар сард Нэхмэлийн салбарт хамтран ажиллах тухай эрмэлзэх бичигт талууд гарын үсэг зурснаар Монгол, Италиийн Нэхмэлийн технологийн төвийг Монгол улсад байгуулах эрх зүйн боломж бүрдсэн. Үүнийг ажил хэрэг болгохоор үргэлжлүүлэн ажиллахын зэрэгцээ экспортын барааны гарал үүслийг тодорхойлох, гарал үүслийн гэрчилгээ олгох тогтолцоог сайжруулахад дэмжлэг үзүүлэхээ Элчин сайд Л.Ботта илэрхийлэв.
Түүнчлэн энэ онд тохиож буй Монгол, Италийн хооронд дипломат харилцаа тогтоосны 50 жилийн ойн хүрээнд зохион байгуулах соёл, урлагийн арга хэмжээний талаар санал солилцлоо.
Гадаад харилцааны яам
