Гэрэл зургийг МОНЦАМЭ агентлаг
Оны онцлох ААН, байгууллагууд, бизнес эрхлэгчдийг шалгаруулан өргөмжилдөг “Энтрепренер-2019” ёслолын ажиллагаа МҮХАҮТ-ын Их танхимд боллоо. Оны онцлох 10 ААН-ээр:
- "Эрдэнэт үйлдвэр" ТӨҮГ,
- "Энержи ресурс",
- "Номин холдинг",
- "ТЭС корпораци",
- "Сүү",
- "М Си Эс Кока кола",
- "Монос групп",
- "Ханбогд кашмер",
- "Өгөөж чихэр боов" ХХК шалгараад байна.
Удаалаад “Үндэсний үйлдвэрлэгч-Энтрепренер”-ээр “Жем интернэйшнл”, “Монос хүнс”, “Экспортлогч энтрепренер”-ээр “Гоёл кашмер”, “Сайн засаглалыг хэрэгжүүлэгч энтрепренер”-ээр “Очир Ундраа ОМЗ ББСБ” ХХК гээд 26 номинациар ААН-үүдийг шалгаруулжээ.
Тухайлбал, “Greenpreneur-2019” номинациийн “Байгальд ээлтэй ногоон технологи нэвтрүүлэгч Энтрепренер”-ээр “Монцемент Билдинг материалс”, “Сэргээгдэх эрчим хүч үйлдвэрлэгч Энтрепренер”-ээр “Мөнх Дэвжих буян”, “Байгалийн нөхөн сэргээгч Энтрепренер”-ээр “Хатандалай” ХХК тус тус шалгарчээ.
МҮХАҮТ-ын ерөнхийлөгч О.Амартүвшин “Оны онцлох ААН-үүдийг шалгаруулах нь ТОП-100-гаас ялгаатай байдаг. Тухайн жилдээ юу хийж бүтээсэн, онцлох зүйл юу байна гэдгийг харж, үндсэндээ 10 шалгуур үзүүлэлтээр шалгаруулдаг. Энд тухайн компанийн борлуулалт болон ашиг бус, нийгэмд үзүүлж буй хариуцлага, нөлөөлөл буюу ажлын байр нэмэгдүүлж байгаа, экспортод гаргаж буй бүтээгдэхүүн гээд олон үзүүлэлтээр шалгаруулдаг ач холбогдолтой.
Энэ жил улсын ууган том үйлдвэр “Эрдэнэт үйлдвэр” ТӨҮГ бүх л үзүүлэлтээр хамгийн өндөр оноо авч шалгарсанд тус үйлдвэрийн удирдлага, хамт олонд Шинэ жилийн баярын мэнд хүргэе.
Онцлох ААН-үүдийн шинэ жилийн шалгаруулалт нь Монгол Улсын эдийн засгийг нуруун дээрээ үүрч яваа хувийн хэвшлийнхэн, нийт бизнес эрхлэгчдийн хүсэн хүлээдэг хамгийн чухал үйл явдал юм” гэв.
Ёслолд УИХ-ын гишүүн, Гадаад харилцааны сайд Д.Цогтбаатар, БОАЖ-ын сайд Н.Цэрэнбат, ХХААХҮ-ийн сайд Ч.Улаан, УУХҮ-ийн сайд Д.Сумьяабазар нар оролцож, онцлох ААН-үүдэд шагналыг гардуулав. Энэ удаагийн шалгаруулалт нь 23 дахь жилдээ болж байна. “Энтрепренер-2019” ёслолын үеэр МҮХАҮТ-ын 5000 дахь гишүүн болсон “Өгөөж Мандал-Уул” ХХК-д гишүүнчлэлийн “Даймонд” ангиллын гэрчилгээг гардууллаа.
