Хүнс, хөдөө аж ахуй, хөнгөн үйлдвэрийн яамны харьяа Жижиг, дунд үйлдвэрийг хөгжүүлэх сангаас “Жижиг дунд үйлдвэрлэл зээл: Хамтын ажиллагаа-Хариуцлага” сэдэвт уулзалт хэлэлцүүлгийг өнгөрөгч баасан гаригт зохион байгууллаа.

Тус сангаас зээл авсан нийт зээлдэгчдэд зориулсан энэ удаагийн уулзалтад 80 гаруй аж ахуйн нэгж, бизнес эрхлэгч иргэд оролцсон байна.

Мөн төслийн мэргэшсэн зөвлөгөө өгдөг мэргэжилтнүүдийг урьж "төслийг хэрхэн үйр дүнтэй, амжилттай хэрэгжүүлэх болон урьпчилан хэрэгжүүлэх шаардлагатай үйл ажиллагаануудын төлөөр заавар, зөвлөгөө өгсөн байна. Харин татварын орчны тухай буюу ЖДҮ эрхлэгчид юунд анхаарах шаардлагатай талаар төрийн байгууллагын холбогдох мэргэжилтнүүд зөвлөгөө мэдээлэл өгчээ.

Уулзалтын үеэр ЖДҮХС-аас зээл авч, төслөө амжилттай хэрэгжүүлсэн “Цайдам трейд” компанийн захирал Х.Ихбаяр, А.Солонго нар өөрсдийн сайн туршлагаа хуваалцсанаас гадна төслийг хэрхэн амжилттай удирдах болон эрсдлийн удирдлагын талаар “Төслийн удирдлагын хүрээлэн” ТББ-ын захирал Ц.Өнөржаргал илтгэл мэдээлэл хийжээ.

Уг уулзалт,ын талаар “Инахис” компанийн захирал Н.Мөнхбаяр “Өнөөдрийн үйл ажиллагаа нэлээд үр өгөөжтэй болж өндөрлөлөө. Манайх резинэн хавтан үйлдвэрлэлийн чиглэлээр үйл ажиллагаа явуулдаг бөгөөд ЖДҮХС-аас анх удаа зээл авч байгаа. Бидний хувьд өмнөх жилүүдэд өвлийн улиралд үйл ажиллагаагаа бүрэн зогсоодог байсан бол одоо улирал харгалзахгүйгээр жилийн дөрвөн улиралд үйлдвэрлэлээ явуулах бүрэн боломжтой болж байгаа. Энэ нь хавар гэхэд худалдан борлуулах бүтээгдэхүүний нөөцөө хангалттай бий болгох боломжийг олгож байгаа тул их олзуурхаж байна” гэв.

“Жонон од” компанийн захирал Г.Одгэрэл “Манай компанийн хувьд ЖДҮХС-аас анх удаа зээл авч байна. Бид арьс, ширэн эдлэл үйлдвэрлэж экспортод гаргадаг. Зээлд хамрагдсанаар

-Экспортын бүтээгдэхүүний нэр, төрлөө нэмэгдүүлэх

-Эскпортын хэмжээгээ нэмэгдүүлэх

-Бусад жижиг дунд үйлдвэрлэл эрхлэгчидтэй түүхий эд зэрэг дээр хамтарч ажилладаг тул харилцан бие биенээ дэмжих, өсөж дэвших боломж бий боллоо гэж харж байгаа. Өнөөдрийн үйл ажиллагааны хувьд сэтгэл хангалуун байна. Ялангуяа Өнөржаргал гуайн илтгэл их үр өгөөжтэй санагдсан” гэв.

“Арга шагай” компанийн ерөнхий захирал Б.Хонгоршагай “Манайх мод, арьс ширэн эдлэл үйлдвэрлэдэг компани. ЖДҮХС-аас тоног төхөөрөмжийн зээл авсан.

Үйлдвэрийн тоног төхөөрөмжөө шинэчилж, урьд нь байгаагүй тоног төхөөрөмжүүдийг үйлдвэрлэлдээ нэвтрүүлснээр илүү чанартай, орчин үеийн шинэлэг бүтээгдэхүүнүүдийг үйлдвэрлэх боломжтой болно.

Мөн бүтээгдэхүүний гарц нэмэгдэж, үйлдвэрлэлд зарцуулах хугацаа багасна. Ач холбогдол, дэвшил нь үүнд л байна даа” гэв.