Баянзүрх дүүргийн 133 дугаар сургууль дөрвөн ээлжээр хичээллэж байгаа тухай тус сургуулийн эцэг эхчүүд өнөөдөр Үндэсний мэдээллийн төвд мэдээлэл хийлээ. Нийт 1800 гаруй хүүхэдтэй 133 дугаар сургуулийн сурагчид одоогоор "Монгол тэмүүлэл" сургуулийн 1, 2 дугаар давхарт дөрвөн ээлжээр хоёр, хоёр цагаар хичээллэж байгаа гэнэ.
Эцэг, эхчүүдийн төлөөлөгч Б.Батдэлгэр:
-“Манай хороонд сургуулийн насны 5,600, цэцэрлэгийн насны 2,900 хүүхэд байна. Гэтэл хорооны хүүхдүүд улсын гэх ганцхан сургуультай, нэг ч цэцэрлэг байхгүй. Ганц байгаа 133 дугаар сургууль нь 1800 гаруй хүүхэдтэй, өөрийн гэсэн байргүй учраас "Монгол тэмүүлэл" сургуулийн байрны 1, 2 дугаар давхарт дөрвөн ээлжээр хичээллэж байна. Монгол Улсын хэмжээнд 4 ээлжээр хичээллэж байгаа ганц сургууль нь 133 дугаар сургууль болчихоод байна.
Бусад сургуулийн нэгдүгээр ангийн хүүхдүүд сургууль дээрээ 4-5 цаг хичээллэдэг. Гэтэл энэ сургуулийн хүүхдүүд ердөө 2-хон цаг хагас дутуу хичээллэж, үлдсэн хичээлээ гэртээ нөхөх нөхцөлтэй байна. Дөрөв дэх ээлжийн 240 орчим сурагч орой 19:40 цагт тардаг. Одоо цаг хүйтэрч байна. Эрт харанхуй болоход энэ хүүхдүүд яаж харанхуйд харих вэ. Энэ бол хүүхдийн сурч, боловсрох эрхийг зөрчиж байгаа хэрэг.
"Монгол тэмүүлэл" сургуулийн 1, 2 дугаар давхарт 1800 хүүхэд суралцаж байхад яг адилхан зайд буюу 3,4 давхарт нь 200 орчим хүүхэд сурч байна. Хүний эрхийн үндэсний комиссоос хүртэл “Хоёр адилхан сургуулийн хүүхдүүдэд ялгавартай, тэгш бус хандаж байгаа зохисгүй байдлыг залруулах, улмаар тус сургуулийн барилгын асуудлыг яаралтай шийдвэрлэх тухай БСШУС-ын сайдад үүрэг өгсөн байдаг. Энэ үүргийг сайд заавал биелүүлэх ёстой. Уг нь наймдугаар сарын 30-нд Боловсролын сайдын 549 тоот тушаал гарсан. Тушаал гараад бүтэн нэг сар болоход ямар ч өөрчлөлт алга" гэв.
Сургуулийн Үйлдвэрчний эвлэлийн дарга Д.Өсөхцэцэг
-"Монгол тэмүүлэл" сургуулийн 1, 2 дугаар давхрын 13 анги танхимд манай сургуулийн 43 бүлэг дөрвөн ээлжээр хичээллэж байна. Дээр нь багш нарын өрөө байхгүй учраас өдөржин коридорт зогсч, өглөө 8.00 цагт ирсэн багш бүтэн 12 цаг тасралтгүй ажиллаж байна.
Уг нь гурван ээлжээр ажиллаж байгаа багш нарт илүү цагийн хөлс олгох ёстой. Гэтэл дөрвөн ээлжээр ажиллаж байгаа багш нарт илүү цагийн хөлс алга. Нийслэлийн засаг дарга, БСШУС-ын сайд болон бусад холбогдох албаны хүмүүсийг сургуулийн нөхцлийг өөрсдийн нүдээр очиж харахыг хүсэж байна. Ийм олон хүүхэдтэй сургалтын үйл ажиллагаа явуулахад агааржуулалтаас эхлээд асуудал их байна. БСШУСЯ энэ асуудлаа шийдэж чадахгүй бол сургалтын үйл ажиллагаагаа зогсоохыг шаардаж байна" гэлээ.