Шударга өрсөлдөөн хэрэглэгчдийн төлөө газарт иргэдээс ирсэн гомдлын талаар өнөөдөр мэдээлэл хийлээ.
Хэрэглэгчийн мэдээллийн 1284 утсаар энэ оны наймдугаар сарын 1-нээс есдүгээр сарын 18-ны хооронд орон сууцны халаалт, дулаантай холбоотой 29 өргөдөл гомдол иржээ. Гомдлын тоог бусад саруудтай харьцуулахад ихэссэн ба цаашид өсөх хандлагатай байгааг ШӨХТГ-ын Хэрэглэгчийн эрхийг хамгаалах газрын дарга Ш.Цэрэндулам мэдээллийн эхэнд хэллээ.
Хэрэглээний усны үнэ тариф нэмэгдсэн ба орон сууцны үйл ажиллагаа эрхэлдэг тусгай зөвшөөрөлтэй компаниуд ус, суурь хураамжны үнийг нэмж тооцож байна, тусгай зөвшөөрөлтэй компаниуд халаалтаа өгөхгүй болон цахилгаанаа хязгаарлаж, ус, цахилгааны төлбөрөө цагт нь төлж байхад үйлчилгээг бүрэн үзүүлдэггүй гэх гомдлууд зонхилсон байна.
Ш.Цэрэндулам:
-“Тусгай зөвшөөрөлгүй компаниудын хувьд өр төлбөр үүсгэсэн, чирэгдэл учруулсан тохиолдолд хариуцлага тооцох нөхцөл байдал хязгаарлагдмал байдаг. Тэгсэн хэрнэ үйл ажиллагаагаа үргэлжлүүлдэг нөхцөл байдалтайгаар нийт хэрэглэгчдийг хохироож байна.
Энэ сарын 15-ны дотор сургууль, цэцэрлэг, эмнэлэг, орон сууцны халаалтыг өгөх ёстой. Гэтэл зарим орон сууцны халаалтыг одоо болтол өгөөгүй байна. Энэ нь тусгай зөвшөөрөлгүй болон “Улаанбаатар дулааны сүлжээ”-нд төлбөрийн үлдэгдэлтэй байгууллагууд тухайн орон сууцыг дулаанаар хангахгүй байгаатай холбоотой.
Иймд ШӨХТГ-аас улсын байцаагчийн албан шаардлагыг өр төлбөр үүсгэж, хэрэглэгчдийг хохироосон “Ган инженер”, “Бадамлах нар” гэх тусгай зөвшөөрөлтэй компанид тус тус хүргүүлээд байна. 12 аж ахуйн нэгж байгууллага, 24 байранд засвар хийж байгаа тул дулаан нь ирээгүй байна" гэлээ.
Мөн зарим орон сууцанд Барилга хот байгуулалтын яамнаас тендер нь удаашралтай зарлагдсны улмаас засварын ажил нь хойшилж хийгдэж байгаа ба тус яам орон сууцны бодлого хариуцаж ажилдгийн хувьд энэ үйл ажиллагаагаа эрт зарлаж, иргэд хэрэглэгчдэд чирэгдэлгүй үйлчлэх үүрэгтэй гэв.
Албан шаардлагад заасан үүрэгт ажлыг биелүүлсэн талаарх мэдээллийг есдүгээр сарын 30-ны дотор ШӨХТГ-т ирүүлэх бөгөөд биелүүлээгүй тохиолдолд хуулийн дагуу холбогдох хариуцлагыг хүлээлгэхийг мэдэгдлээ.