Удтал талцан хэрэлдэж байсан Монголын үндэсний бөхийн холбоо сая нэг маргаандаа цэг тавив бололтой. "Гацуурт" компанийн ерөнхий захирал Л.Чинбат өчигдөр холбооны тамга тэмдгийг УИХ-ын гишүүн Б.Бат-Эрдэнэд гардуулан өгсөн байна. Энэ тухай “Гацуурт” компанийн захирал Л.Чинбат өөрийн цахим хуудсаар дамжуулан мэдэгжээ.
Б.Бат-Эрдэнэ нь 2017 онд тус холбооны тэргүүнээр сонгогдсон холбооны дотоод маргаанаас болж шинэ тэргүүн тамга тэмдгээ авч чадалгүй хоёр жил болсон байна.
Там тэмдгийг хүлээлгэн өгөх үеэр экс тэргүүн Л.Чинбат "Монголын үндэсний бөхийн олон жилийн талцал хуваагдалд цэг тавилаа. Цаашид үндэсний бөхийг зангидаж явна гэж итгэж Дархан аварга Б.Бат-Эрдэнэд МҮБХ-ны албан ёсны тамга тэмдгийг хүлээлгэж өглөө. Та бүхнийхээ цаашдын ажил хөдөлмөрт амжилт бүтээлийн дээдийг хүсэн ерөөе" гэжээ.
Харин Монголын үндэсний бөхийн холбооны тэргүүн Б.Бат-Эрдэнэ “Сүүлийн 7-8 сар Монгол бөхийн холбоонд бий болсон үл ойлголцол, талцал маргааныг арилгахын төлөө ажиллаж, ойлголцон нэгдсэн хурлаа хийх зарчимтай ажилласан. Бөхийн холбоо талцал хуваагдал байхгүй, холбоог нэг бодлогоор авч явна” гэв.