-Индонезид аялал жуулчлалын чиглэлээр суралцсан гэсэн. Яагаад энэ улсыг сонгож суралцсан юм бэ?

-Би 2014 онд Сити их сургуулийг бизнесийн удирдлагын чиглэлээр төгссөн. Индонезийн Засгийн газрын Дармасисва тэтгэлэгт тэнцээд Бали арлын Денпасар хотын сургуульд аялал жуулчлалын чиглэлээр 2014-2015 онд суралцсан. Индонезид сурч байхдаа анхны аяллын гараагаа эхлүүлсэн. Гадаадад урт хугацаагаар амьдарч, суралцах үедээ нүд нээгдэж бусад орны залуучууд өөрсдийгөө залуу, мөнгөгүй гэхгүйгээр олон газар руу аялдаг юм билээ.

Надад ч бас боломж байгаа гэдгийг ойлгосон. Балид хамт сурч байсан Эквадор охин Фатима надад анхны аяллын урам зоригийг өгсөн. Тэгээд Индонезийн Жава арлаар Фатиматай долоо хоног үүргэвчтэй аялал хийсэн.

-Аяллаар явахдаа олон адал явдалтай таарсан байх. Ялангуяа, анхны аялал хөгжилтэй байв уу?

-Тэр аялал адал явдалтай байсан. Том усан онгоц, жижиг завинд суухаас эхлээд ачааны машины тэвшин дээр гээд янз бүрийн тээврийн хэрэгслээр явж үзсэн. Олон сонирхолтой газарт байрлаж миний төсөөлснөөс илүү гоё шинэ, соргог мэдрэмжийг өгсөн. Аялахын тулд их мөнгө хэрэггүй, өөрөө хичээвэл олон газраар аялах боломжтойг мэдсэн.

Сургуулиа төгсөөд Монгол руу буцахдаа Зүүн Өмнөд Азийн 1-2 улсаар ганцаараа аялъя гэж Фатимад хэлэхэд “чи чадна” гэж зоригжуулснаар анх Тайланд руу долоо хоног үүргэвчтэй аялсан. Дараа нь Хонг Конгоор дамжиж Монголдоо ирсэн. Энэ үеэс аяллын гарц нээгдсэн.

-Аялал гэхээр бид их мөнгө бодоод хойшлуулаад байдаг. Хоёр сая төгрөгөөр Европын найман орноор аялсан гэхээр итгэхэд хэцүү юм?

-2015 оноос эхлээд гурван жилийн хугацаанд 34 улсаар аялсан. Нийт 25 аялал хийсэн. Нэг аяллын зардал дунджаар 1-5 сая төгрөгийн хооронд байдаг. Европын найман орноор 2016 оны хавар аялсан. Тухайн үед Италийн Басселгади Пине хотод олон улсын оюутны тэшүүрийн аварга шалгаруулах тэмцээнд олон улсын сайн дурын сэтгүүлчээр ажиллах боломж олдсон.

Тэр тэмцээнд долоо хоног ажиллаад буцаж ирэхээр харамсалтай санагдаад cap гаруй хугацаанд өөрт байсан хоёр сая төгрөгтөө багтаагаад аялсан. Амьдралдаа хэзээ ч уулзаж байгаагүй хамаатныдаа, хуучин ажлынхаа танилын дүүгийнд, бас огт танихгүй айлд хонохоос эхлээд амьдрах байрныхаа мөнгийг их хэмнэсэн. Зарим үед төөрөөд автобусны буудал дээр хүртэл хонож байсан. Хөгжилтэй зүйлс их тохиолдсон.

-Иранд хүн аялах нь байтугай өөр зорилгоор ч очихоос айдаг улс. Гэтэл та яагаад аялах болов?

-Жилийн өмнө Дундад Азийн Израйль, Палестин, Турк, Иранаар cap гаруй хугацаанд аялсан. Энэ улсуудаас би Ираныг онцолно. Миний хувьд заавал очиж үзэх ёстой газрын нэг гэж шийдсэн учраас Тегеран, Исфахан хотоор ес хоног аялсан.

Хамгийн анх Иран руу аялна гэдгээ найз нөхдөдөө хэлэхэд аюултай, халдлага ихтэй газар яваад хэрэггүй гэж эсэргүүцсэн. Гэхдээ хүмүүстэй нь дотно танилцаад найзлахад буруу дүгнэсэн юм байна гэдгээ ойлгосон. Аялж байх хугацаандаа тайван, айдасгүй байсан. Иргэд нь их элэгсэг, найрсаг, сониуч, цайлган сэтгэлтэй байсан. Өөр нууцлаг ертөнцөд орж ирсэн мэт санагдаж, Иранаар аялсан нь надад мартагдашгүй дурсамж үлдээсэн.

-Залууст хямд зардлаар аялах боломжтой “Nomadic Soul” аяллын компаниа байгуулсан гэсэн?

-Аялал дууссаны дараа дараагийн аялал чинь хаашаа вэ, хамтдаа аялж болох уу гэж их асуусан. Яг над шиг хямдхан зардлаар аялахыг хүссэн хүмүүстэй яагаад хамт аялж болохгүй гэж гэсэн бодол толгойд орж ирсэн. Энэ бодлоо хэрэгжүүлээд компаниа байгуулаад Зүүн Өмнөд Ази болон Кавказын 4-6 орноор хамгийн хямд зардлаар хоёр долоо хоногийн аяллыг зохион байгуулдаг болсон.

Мөн аяллын хөтөлбөрөө гаргаж чадахгүй байгаа хүмүүст зөвлөгөө өгдөг. Миний амьдралынхаа туршид хийх ёстой зүйл бол аялах юм байна гэдгийг ойлгосон учраас хоббигоо ажил болгоод явж байна.

Зууны мэдээ