Өчигдөр АНУ-ын ерөнхийлөгч Дональд Трамп твиттер хуудсандаа Сирид пуужингийн цохилт өгөх гэж байгаагаа зарлаж, Оросын талыг хүлээж авахад бэлэн байхыг сануулжээ.

Өнгөрсөн Бямба гаригт Башар аль Ассадын арми зүүн Гута бүсийн Доума хотхонд байгаа сөрөг хүчнийхэнд химийн зэвсгийн цохилт өгсөн мэдээлэл цацагдсан юм. Энэ довтолгооны улмаас 70 орчим хүн амиа алдаж, 500 гаруй хүнд хордлогын шинж илэрсэн байна.

Энэ явдлын дараа Трамп химийн зэвсэг хэрэглэсэн явдлыг тэвчихгүй гээд Сирийн дэглэмд хатуу цохилтоор хариу барихаа амласан юм. Тэр Ассадын армид цохилт өгөхдөө Франц, Британий холбоотнуудтайгаа хамтрана гэдгээ мэдэгдсэн. Харин сүүлд хийсэн мэдэгдэл нь тэд цохилтын төлөвлөгөөгөө боловсруулж дууссаныг харуулж байна. Трамп твиттер хуудсандаа “Сири рүү харвасан ямар ч пуужинг устгана гэдгээ Оросын тал амласан. Одоо бэлтгээрэй Оросуудаа! удахгүй шинэ, хүчирхэг, ухаалаг пуужин очино. Та нар хорт хийгээр хүмүүсийг алж баясдаг адгуустай түншлээд хэрэггүй байсан юм!” гэж бичжээ.

Трампын сүүлийн жиргээний дараа Оросын “Вести 24” телевизийн мэдээний хөтөлбөрөөр, хэрэв АНУ цөмийн цохилт өгвөл ундны хэрэгцээгээ хангах хоол, хүнсээ бэлтгэх, хорт хийн баг өмсөх болон газар доор хоргодох байранд очих талаар мэдээлжээ. Цөмийн дайралт хийсэн тохиолдолд өтгөрүүлсэн сүү, шар буурцгийн мах, нөөцлах боломжтой хагас боловсруулсан бүтээгдэхүүн авахыг зөвлөсөн байв. Гэвч өчигдөр орой НҮБ-ын Аюулгүйн зөвлөл хуралдаж Сирид цэргийн ажиллагаа явулах асуудлыг хэлэлцээд түр түдгэлзүүлжээ.