Ойрын өдрүүдэд усархаг бороо их орсны улмаас Сэлэнгэ аймгийн нутгаар урсан өнгөрдөг Ерөө гол үерийн түвшинд, Хүдэр гол үерийн аюултай түвшнийг давж үерлэжээ.

Сэлэнгэ аймгийн нутгаар урсан өнгөрөх судалгаатай голуудын усны түвшний хэмжээ нэмэгдсэн байгааг аймгийн УЦУОШТ-өөс мэдээллээ.

Өнөөдрийн байдлаар Ерөө голын түвшин Ерөө, Дулаанхан, Бугант тосгон, Баянгол сум орчмоор 3-88 см, Орхон гол Сүхбаатар сум орчмоор 50 см, Хүдэр гол Хүдэр сум орчмоор өмнөх өдрөөсөө 99 см-ээр тус тус нэмэгдсэн байна.

Харин Сэлэнгэ мөрөн Зүүнбүрэн, Сүхбаатар сум орчмоор 2-5 см, Зэлтэр гол Түшиг сум орчим 3 см-ээр тус тус буурсан байна.

Иймд ард иргэд болон аялагчид аялал жуулчлалын чиглэлээр үйл ажиллагаа эрхэлж буй аж ахуйн нэгж малчид та гол, мөрөн, горхины эрэг дагуу отоглох, хоноглох, тээврийн хэрэгслээр гарахгүй байх.

Хүүхдийг гол усны орчимд хараа хяналтгүй орхихгүй байх.

Үерийн аюултай бүс, жалга, сайр болон усанд автаж болзошгүй газраар зорчихгүй байх.

Цаг агаарын мэдээ, онцгой байдлын байгууллагын сэрэмжлүүлгийг тогтмол дагаж мөрдөх. Аялал жуулчлалын үйлчилгээ эрхлэгчид зочид, аялагчдын аюулгүй байдлыг хангаж, шаардлагатай урьдчилан сэргийлэх арга хэмжээг авч ажиллах.

Иргэн бүр сонор сэрэмжтэй байж, өөрийн болон бусдын аюулгүй байдлыг ханган болзошгүй эрсдэлээс урьдчилан сэргийлэхийг онцгойлон анхаарууллаа.