ССАЖЗЯболон “Монголын уран нугаралтын холбоо” хамтран "Уян-Монголын уран нугаралтын чуулга уулзалт-2026”-ыг Налайх дүүрэгт энэ сарын 20, 21-нд зохион байгууллаа.
Монголын уран нугаралтын өв соёлыг дэлхийн тавцанд таниулан сурталчлах, өвлүүлэн үлдээх зорилготой тус чуулга уулзалтыг МУГЖ, уран нугараач Э.Лхагва-Очирын санаачилгаар зохион байгуулав.
Энэ удаагийн чуулганд Япон, Франц, Хонконг, Хорват болон Монголын 200 гаруй уран нугараач, багш нар нэгэн тайзнаа чуулж, Монголын уран нугаралтын үнэ цэн, гайхамшгийг дэлхий дахинд таниулсан юм. Мөн дэлхий нийтийн анхаарлыг татсан Netflix-ийн "Physical: Asia" шоуны олон улсын оролцогчид болон тус шоуны финалд шалгарсан Монгол багийн тамирчид хүндэт зочноор уригдан оролцсоноороо онцлогтой.
Чуулганы үеэр Монголын уран нугаралтын урлагийн түүхэн хөгжил, өнөөгийн чиг хандлагын талаарх хэлэлцүүлэг, эрдэм шинжилгээний илтгэл, мэргэжлийн уралдаан, тэмцээн болон воркшоп сургалт, Монгол уран нугаралтын түүхийг харуулсан баримтат киноны үзвэр, үндэсний өв соёлыг шингээсэн бэсрэг наадам, "UYAN SHOW: Gravity & Grace" олон улсын гала тоглолт болов.
Өнөөдөр Монголын уран нугаралтын урлаг дэлхийн олон орны тайзнаа үнэлэгдэж, олон улсын циркийн урлагийн хөгжлийн салшгүй хэсэг болсон. Монголын уран нугараачид дэлхийн 50 гаруй оронд тоглолтоо үзүүлж, олон улсын циркийн наадмуудаас 100 гаруй алт, мөнгө, хүрэл медаль хүртээд байна.
“Уян” чуулга уулзалтыг анх 2023 онд АНУ-ын Лас Вегас хотноо эхэлж, 2024 онд Улаанбаатарт, 2025 онд АНУ-ын Миннесота мужид тус тус зохион байгуулан, нийт 1000 гаруй уран нугаралтын мэргэжлийн уран бүтээлчид болон сонирхогчдыг эгнээндээ нэгтгэсэн юм.
