Дундговийн нутаг, Өмнөговийн хойд хэсгээр өнөөдөр салхи секундэд 18-20 метр, зарим үед 24 метрийг давж ширүүснэ.

Мөн Хэнтийн хойд хэсгээр хүйтэн бороо, өмнөд хэсэг болон Дорноговь, Сүхбаатарын нутгаар бороо, дуу цахилгаантай аадар орж, говь, тал, хээрийн нутгаар салхи шуургатай байхыг ЦУОШГ-аас анхаарууллаа.

Монгол орны нутгийн баруун хэсгээр багавтар, бусад нутгаар солигдмол үүлтэй. Төвийн аймгуудын нутгийн зарим, говийн аймгуудын нутгийн зүүн, зүүн аймгуудын нутгийн баруун, өмнөд хэсгээр бороо, дуу цахилгаантай аадар, уулаараа цас орно. Салхи нутгийн зүүн хэсгээр баруун өмнөөс баруун хойш эргэж, бусад нутгаар баруун хойноос секундэд 7-12, нутгийн өмнөд хэсгээр 18-20 метр хүрч ширүүснэ.

Нийт нутгаар сэрүүсэж Дархадын хотгор, Хэнтийн уулархаг нутаг, Орхон, Ерөө, Тэрэлж, Хэрлэн, Онон голын хөндийгөөр 5-10, Хангай, Хөвсгөлийн уулархаг нутаг, Хүрэнбэлчир орчим, Эг Үүр, Сэлэнгэ, Хараа, Туул голын хөндийгөөр 9-14, Их нууруудын хотгор, Эхийн голын Баянбүрд орчмоор 24-29, Монгол-Алтайн уулархаг нутаг, говийн бүс нутгийн зүүн өмнөд хэсэг, Дарьгангын тал нутаг, Халх гол орчмоор 18-23, бусад нутгаар 12-17 градус дулаан байх юм.

Улаанбаатар хот орчмоор үүлшиж, бага зэргийн бороо орно. Салхи баруун өмнөөс баруун хойш эргэж секундэд 8-13 метр, борооны өмнө түр зуур ширүүсэн, өдөртөө 8-10 градус дулаан байна.

Багануур орчмоор үүлшиж, бороо орно. Салхи баруун өмнөөс баруун хойш эргэж секундэд 9-14 метр, борооны өмнө түр зуур ширүүсэж, 7-9 градус дулаан байна.

Тэрэлж орчмоор үүлшин, бороо, уулаараа цас орно. Салхи баруун өмнөөс баруун хойш эргэж секундэд 6-11 метр, борооны өмнө түр зуур ширүүсэж, 5-7 градус дулаан байна.