Төв халхын алдарт уртын дуучин МУГЖ С.Сумьяагийн нэрэмжит уртын дуу дуулаачдын улсын уралдаан энэ сарын 13, 14-нд Арвайхээр суманд болно.

Монгол үндэстний давтагдашгүй соёлын биет бус өв болох монгол уртын дууг судлан шинжлэх, түгээн дэлгэрүүлэх, өвлүүлэн уламжлуулах, мөн С.Сумьяа агсны уран бүтээлийг залуу хойч үед сурталчлан таниулах зорилгоор тус уралдааныг Монголын уртын дууны холбоо, аймгийн ЗДТГ, Соёл, урлаг, аялал жуулчлалын газар, Хөгжимт драмын театр хамтран зохион байгуулна.

Уралдаанд мэргэжлийн болон өвлөн уламжлагчдын ангиллаар оролцох бөгөөд оролцогчид МУГЖ С.Сумьяагийн урын санд багтах “Хүрэн толгойн сүүдэр”, “Өлийн даваа”, “Хэрлэнгийн барьяа”, “Цомбон туурайтай хүрэн”, “Эрдэнэ засгийн унага”, “Бор тойрмын бялзуухай” зэрэг олон арван уртын дуунаас сонгон дуулах боломжтой юм.

Монгол Улсын гавьяат жүжигчин Самбуугийн Сумьяа нь 1941 онд Өвөрхангай аймгийн Сант суманд төржээ. Тэрбээр бага насандаа ааваасаа “Зээргэнтийн шил”, “Торой банди” зэрэг уртын дууг анхлан сурч, айлын найр наадамд аавыгаа даган дуулдаг байжээ.

Тэрбээр 70 гаруй уртын дууг урын сандаа багтааснаас “Цэвцгэр хурдан шарга”, “Хэрлэнгийн барьяа”, “Уянхан замбуу тивийн наран”, “Дөмөн”, “Хоёр бор”, “Соёг бор”, “Хөөрхөн халиун”, “Саруул талбай” зэрэг олон дууг өөрийн өвөрмөц арга барил, дуу хоолойн өнгө аясаар дуулсан хэмээн мэргэжлийнхэн үнэлдэг.

Мөн “Учиртай гурван толгой” дуурийн Хоролмаа, Ч.Ойдовын “Далан худалч” хөгжимт драмын жүжгийн Пагам, С.Равдангийн “Арвайхээр” жүжгийн Хүдэрмаа, Д.Намдагийн “Шинэ байшинд” жүжгийн Жавзан зэрэг 50 гаруй жүжгийн гол болон туслах дүрийг бүтээсэн байна. Түүнчлэн Монголын уран сайхны “Тууврын замд” киноны гэрийн эзэгтэй, “Ард Аюуш” киноны Дарьзав хатны дүрийг чадварлаг бүтээжээ.