Олон улсын сагсан бөмбөгийн холбооноос зохион байгуулдаг 3х3-ын насанд хүрэгчдийн дэлхийн аварга шалгаруулах тэмцээн Польшийн Варшав хотод эхэллээ.

Долоо хоног үргэлжлэх тэмцээнд эрэгтэй, эмэгтэй тус бүр шилдэг 20 баг өрсөлдөж байгаа бөгөөд Монголын эрэгтэй, эмэгтэй шигшээ хэсгийн эхний хоёр тоглолтоо өчигдөр хийв.

Эрэгтэйчүүд “В” хэсэгт Чех, Польш, АНУ, Латвитай таарсан. Тэд хэсгийн эхний тоглолтдоо Чехийн шигшээд 14:17-гоор хожигдлоо. Манай тамирчид тоглолтыг сайн эхлүүлсэн ч төгсгөл тааруу байсан нь эцсийн үр дүнд нөлөөлөв. Харин хэсгийн хоёр дахь тоглолтдоо талбайн эзэн Польшийн шигшээ багийг 21:19-өөр буулган авлаа. Энэ хэсгийг Чехийн шигшээ хоёр хожилтой тэргүүлж байгаа бол Монгол, Латвийн баг тус бүр нэг хожилтой удаалж байна. Харин АНУ нэг, Польш хоёр хожигджээ. Эрэгтэйчүүд хэсгийн сүүлийн тоглолтуудаа энэ сарын 5-ны 01:20 цагаас АНУ, 03:10 цагаас Латвийн багтай хийнэ.

Тэгвэл эмэгтэйчүүд “В” хэсэгт Австрали, Испани, АНУ, Унгартай багтсан. Хэсгийн эхний тоглолтдоо Австралийн шигшээд 15:21, дараа нь Испанид 11:13-ээр хожигдлоо. Шигшээ багийн бүрэлдэхүүнд анх багтсан Н.Нандинхүсэл бэлтгэлийн үеэр шагайндаа бэртэл авснаар ДАШТ-ийг өнжихөөр болж түүнийг Б.Болор-Эрдэнэ орлож байгаа юм. Манай баг хэсгийн сүүлийн тоглолтуудаа энэ сарын 5-ны 00:30 цагаас АНУ, 02:45 цагаас Унгартай хийх хуваарьтай.