“Алтан бөмбөг” шагналыг 8 удаа хүртсэн “Интер Майами” багийн довтлогч Лионел Мессигийн нэр ДАШТ-2026-д оролцох Аргентины шигшээ багийн мэдүүлэгт эцсийн байдлаар багтжээ.

Ингэснээр Месси, К.Роналду нар түүхэнд зургаан ДАШТ-д оролцсон анхны хөлбөмбөгчид болох юм. Харин Мексикийн хөлбөмбөгчин Антонио Карбахаль, Рафаэль Маркес нар болон Германы Лотар Маттеус тус тэмцээнд 5 удаа оролцжээ.

ДАШТ-ий хэсгийн шатанд дэлхийн аварга аргентинчууд Австри, Алжир, Иорданы шигшээ багуудтай тоглоно.

Ингээд Аргентины шигшээ багийн бүрэлдэхүүнийг танилцуулъя:

Хаалгачид: Эмилиано Мартинес ("Астон Вилла", Англи), Херонимо Рульи ("Марсель", Франц), Хуан Муссо ("Атлетико", Испани),

Хамгаалагчид: Науэль Молина ("Атлетико", Испани), Гонсало Монтиэль ("Ривер Плейт"), Кристиан Ромеро ("Тоттенхэм", Англи), Николас Отаменди ("Бенфика", Португал), Лисандро Мартинес ("Манчестер Юнайтед", Англи), Николас Тальяфико ("Лион", Франц), Леонардо Балерди, Факундо Медина (хоёулаа - "Марсель", Франц),

Хагас хамгаалагчид: Родриго Де Пауль ("Интер Майами", АНУ), Энцо Фернандес ("Челси", Англи), Валентин Барко ("Страсбур", Франц), Леандро Паредес ("Бока Хуниорс"), Алексис Мак Аллистер ("Ливерпүүл", Англи), Жовани Ло Чельсо ("Бетис", Испани), Эсекьель Паласиос ("Байер", Герман), Тиаго Альмада ("Атлетико", Испани), Нико Пас ("Комо", Итали),

Довтлогчид: Лионел Месси ("Интер Майами", АНУ), Нико Гонсалес, Хулиан Альварес, Жулиано Симеоне (бүгд - "Атлетико", Испани), Флако Лопес ("Палмейрас", Бразил), Лаутаро Мартинес ("Интер", Итали).

Өдгөө 38 настай Месси 2023 оноос хойш “Интер Майами” багт тоглож байгаа юм. Өмнө нь тэрбээр Францын “Пари Сен-Жермен”, Испанийн “Барселона” багуудад тоглож байсан бөгөөд энэ хугацаанд Аваргуудын лигт 4 удаа, УЕФА-гийн Супер цомд 3 удаа түрүүлж, клубүүдийн ДАШТ-д аваргалжээ.

Месси бол 2022 оны дэлхийн аварга, 2014 оны ДАШТ-ий мөнгөн медальт, 2008 оны Олимпын аварга, 2021 ба 2024 оны Америкийн цомын эзэн хөлбөмбөгчин юм.

Эх сурвалж: TASS