Норвегийн хоккейчид Латвийн шигшээ багийг 2:0 харьцаагаар хожсоноор түүхэндээ анх удаа ДАШТ-ий хагас шигшээд шалгарлаа.

Өмнөх ДАШТ-үүдэд норвегичүүд хэсгээсээ гарч чадаагүй бол энэ удаад тэдний амжилт эрс ахижээ.

В хэсэгт канадчууд Чехийн шигшээ хожсоны дүнд Норвегийн баг хэсгээсээ хоёроор гарсан байна. Норвегичүүд хэсэгтээ Канад, Словакийн багуудад хожигдсон боловч шведүүдийг III үед хожсоны ачаар хэсгээсээ дээгүүр байраар гарах боломжтой болжээ.

Хамгийн сүүлд норвегичүүд 2008 ба 2012 онуудад шөвгийн наймд шалгарч байв. 2012 онд тэд дэлхийн аварга болсон Оросын шигшээ багт хожигджээ. Норвегийн шигшээгийн хамгийн том амжилт бол 1951 онд Парист болсон ДАШТ-д зургаан багтай тоглож 2 хожсоноор 4 дүгээр байр эзэлсэн явдал юм.

Энэ удаагийн ДАШТ-ий шөвгийн наймын бусад тоглолтын дүнг танилцуулбал:

Финландын шигшээ баг чехүүдийг 4:1-ээр, Канадын баг америкчуудыг 4:0-ээр, Швейцарын баг шведүүдийг 3:1-ээр тус тус хожсон байна. Одоо хагас шигшээд Швейцар-Норвеги, Канад-Финландын багууд хоорондоо тоглоно.

Хагас шигшээ тоглолт бямба гарагт, финалын ба III байрын төлөөх тоглолтууд ням гарагт болно.

Өнгөрсөн оны ДАШТ-д АНУ-ын шигшээ баг нэмэлт цагт швейцарчуудыг 1:0 харьцаагаар буулган авснаар дэлхий аварга болсон юм. Харин дэлхийн аваргаар 28 удаа шалгарсан Канадын шигшээ баг эл үзүүлэлтээр тэргүүлж байна.