БОУАӨ-ийн сайд Ц.Сандаг-Очир НҮБ-ын Хөгжлийн хөтөлбөрийн Суурин төлөөлөгч Матилда Димовскатай уулзаж, “Хүртээмжтэй ногоон хот” төсөл, байгаль орчны салбарт хэрэгжүүлэх төслийн санхүүжилт, Цөлжилттэй тэмцэх НҮБ-ын конвенцийн Талуудын 17-р бага хурлын бэлтгэл, зохион байгуулалтад хамтран ажиллах талаар санал солилцлоо.
БОУАӨЯ-ны мэдээлснээр, Суурин төлөөлөгч Матилда Димовска Уур амьсгалын өөрчлөлтийн тухай анхдагч хуулийн төслийг салбарын яамнаас боловсруулж, УИХ-д өргөн барьсанд талархан, тус хуулийн төслийн боловсруулалт, хэрэгжилтэд дэмжлэг үзүүлэхээ илэрхийлэв. Мөн энэ оны зургадугаар сард болох НҮБ-ын Хөгжлийн хөтөлбөрийн Монгол Улс дахь үйл ажиллагааны 50 жилийн ойд салбарын сайд ач холбогдол өгч оролцохыг урьжээ.
НҮБ-ын Хөгжлийн хөтөлбөрөөс Монголд хэрэгжүүлж буй төсөл хөтөлбөрийн 30 гаруй хувь нь БОУАӨЯ-нд хамаардаг нь хоёр талын хамтын ажиллагаа стратегийн түвшинд хөгжиж буйн илэрхийлэл болохыг тодотгов. Тэрбээр СОР17 бага хурлын зохион байгуулалтад оролцох сайн дурын ажилтнуудыг бэлтгэх, оролцуулах, санхүүжилт татан төвлөрүүлэх, Монголд хэрэгжүүлэх боломжтой төсөл хөтөлбөр, одоо хэрэгжиж буй төслийн үр дүнг олон улсад сурталчллах зэргээр дэмждэгээ дурдан, энэ хүрээнд төр-хувийн хэшлийн түншлэлийг бэхжүүлэх, газрын доройтолтой тэмцэх, ногоон эдийн засгийг дэмжих чиглэлээр хүргүүлсэн санал, санаачилгыг дэмжиж хамтран ажиллахыг хүслээ.
Сайд Ц.Сандаг-Очир СОР17 бага хурлын бэлтгэлийг эхнээс нь тууштай дэмжиж буйд талархаад, цаашид мэргэшсэн хүний нөөц, техникийн дэмжлэгийн хүрээнд хамтын ажиллагаагаа бэхжүүлэх хүсэлтэйгээ онцлов. Мөн Монгол Улсын тогтвортой хөгжил, уур амьсгалын өөрчлөлтөд дасан зохицох чадавхыг бэхжүүлэх, биологийн олон янз байдлыг хамгаалах, газрын доройтолтой тэмцэх, орон нутгийн тогтвортой амьжиргааг дэмжих чиглэлээр олон жилийн турш найдвартай, стратегийн түнш байсаар ирснийг тэмдэглэж, хамтын ажиллагаанд талархал илэрхийлжээ.
Тэрбээр дэлхий нийт уур амьсгалын өөрчлөлт, газрын доройтол, ган, усны хомсдол, хүнсний аюулгүй байдал зэрэг харилцан хамааралтай сорилттой нүүр тулж буй энэ цаг үед Монгол Улс, НҮБ-ын Хөгжлийн хөтөлбөр хамтран бодит, үр дүнтэй, олон улсад түгээн дэлгэрүүлэх боломжтой шийдлийг хэрэгжүүлэх боломж бүрдэж байгааг тодотгов.
Уулзалтын төгсгөлд талууд СОР17 бага хурлын бэлтгэлийг эрчимжүүлэх, “Хүртээмжтэй ногоон хот” төслийг нийслэлийн алслагдсан дүүргүүдэд үе шаттай хэрэгжүүлэх хэрэгцээ, шаардлага, мөн Даян дэлхийн байгаль орчны сангийн 9 дүгээр санхүүжилтийн хүрээнд хамтын ажиллагааг өргөжүүлэх тухай санал солилцож, цаашид үр дүнтэй хамтран ажиллахаар тохиролцжээ.
