“50 жил-50 мянган мод” санаачилгын хүрээнд гэр хорооллын нэг өрхөд 4-5 нэр төрлийн 40 тарьц, суулгацыг үнэ төлбөргүй олгох ажил өнөөдрөөс эхэллээ.
Эрдэнэт хотын 50 жилийн ойг угтан хотоо ногоон болгох энэхүү санаачилгыг өнгөрсөн жилээс хэрэгжүүлж эхэлсэн бөгөөд Сум дундын ойн ангийн мод үржүүлгийн талбайд ургуулсан 25000 тарьц, суулгацыг 500 өрхөд олгосон байна.
Тус ажлын үргэлжлэл болгон үлдсэн 25000 мод, тарьц, суулгацыг иргэдэд олгож эхэллээ.
Энэ жил нийт 505 өрх бүртгүүлснээс хаягийн зөрчилтэй болон нэг хаяг дээр давхар бүртгүүлсэн зэрэг шалтгаанаар 92 өрхийг хассан байна. Ингэснээр энэ удаагийн мод олголтод нийт 413 өрх хамрагдаж байгаа бөгөөд үлдсэн өрхүүдэд мод, тарьцыг намрын улиралд олгохоор төлөвлөжээ.
Сум дундын ойн анги мод олгосон өрх бүрийг “Тэрбум мод” үндэсний хөдөлгөөний QR кодын системд бүртгэлжүүлж байна. Мөн мод хүлээн авсан өрхүүдэд мод тарих аргачлал, арчилгаа, ургуулах талаар мэдээлэл, зөвлөгөө өгч ажиллах юм.
