Монгол Улс Венецийн 61 дэх удаагийн дүрслэх урлагийн биеннальд үндэсний павьолоноороо оролцож байна.

“Сүлжилдээн-Хил дамнасан холбоос" нэртэй үзэсгэлэнд Б.Номин, Г.Гэрэлхүү, Ё.Төгөлдөр, Д.Дорждэрэм нар уран зураг, видео, баримал, текстил, инсталляцийн олон төрөлт хэлбэрээр Монголын дүрслэх урлагийн өнөөгийн хөгжил, өвөрмөц өнгө төрхийг илэрхийлж оролцож байна.

Тэдний бүтээлүүд уламжлал ба орчин үе, хүн ба оршихуйн харилцаа, байгаль ба соёлын шүтэлцээг өөр өөрийн өнцгөөр тайлбарлан харуулж байна. Монголын павильоны куратороор Ц.Уранчимэг, хамтарсан куратороор Томас Эллер ажиллаж байгаа бөгөөд олон улсын туршлага, судалгааны үндэслэлд тулгуурлан Монголын орчин үеийн дүрслэх урлагийг дэлхийн үзэгчдэд илүү өргөн хүрээнд таниулах зорилготой юм.

Тус үзэсгэлэн мэргэжлтнүүдэд зориулсан урьдчилсан үзвэрийн өдрүүдэд хамгийн олон үзэгчтэй павилионуудын нэг болж байгаа бөгөөд олон улсын тавцанд нэг хэлээр ярилцах боломжийг бүрдүүлсэн ССАЖЗЯ болон “БодьДарма сан”, “Капитрон банк”, “Волт”, “Маршал арт галерей”, “Некст натур дизайн”, “Гончигсумлаа сан”, “Броскод” зэрэг 30 гаруй байгууллага, аж ахуйн нэгж болон хамтран уран бүтээлчиддээ талархаж байгааг зохион байгуулагч болох “Монголын биенналийн сан, Хөх нар Монголын орчин үеийн дүрслэх урлагийн төв”-өөс онцолж байна.