БОУАӨЯ-наас Байгалийн ургамлын тухай болон Ховордсон амьтан, ургамал, түүний гаралтай эд зүйлийн гадаад худалдааг зохицуулах тухай хуулийн шинэчилсэн найруулгын төслийн олон нийтийн хэлэлцүүлгийг зохион байгууллаа.
Хэлэлцүүлэгт төрийн болон эрдэм шинжилгээний байгууллага, иргэний нийгэм, аж ахуйн нэгж, иргэдийн төлөөлөл оролцож, хуулийн төслүүдийн шинэчилсэн найруулгын үзэл баримтлал, зохицуулалтын шинэчлэл, хэрэгжилтийн уялдаа холбоо, биологийн олон янз байдлыг хамгаалах чиглэлээр тусгасан гол өөрчлөлтийг танилцуулан санал солилцсоныг БОУАӨЯ мэдээлэв.
Байгалийн ургамлын тухай хуулийг анх 1995 онд баталж, 1997-2024 онд найман удаа нэмэлт, өөрчлөлт оруулсан бол энэ удаагийн шинэчилсэн найруулгын төсөлд 6 бүлэг, 27 зүйл тусгаж, 12 нэр томьёоны тодорхойлолтыг шинээр нэмснийг танилцууллаа. Шинэчилсэн найруулгаар байгалийн ургамлын зүйл, ургамлын бүлгэмдлийн олон янз байдлыг хамгаалах, нөөцийг зохистой ашиглах, нөхөн сэргээхтэй холбоотой харилцааг боловсронгуй болгохоос гадна Ойн тухай болон бусад хуультай давхардсан зохицуулалтыг арилгаж, байгалийн ургамлыг тарималжуулах, эдийн засгийн эргэлтэд оруулах эрх зүйн орчныг шинэчлэхээр тусгасан байна.
Түүнчлэн ховордсон амьтан, ургамлын гаралтай эд зүйлийн хууль бус худалдаанаас урьдчилан сэргийлэх, хамгаалалт, хяналтыг сайжруулах, байгалийн ургамлын үр, эс, эд, гербарийн санг төрийн мэдэлд хадгалж, хойч үедээ өвлүүлэн үлдээх нөхцөлийг бүрдүүлэхийг хуулийн төсөлд тусгаж, хэлэлцүүлжээ.
