“Тэрбум мод” үндэсний хөдөлгөөний хүрээнд Дорноговь аймаг 2025 оны байдлаар 839,742 мод тарьж, ургуулаад байна.

Тарьсан модыг хүн амын тоонд хувааж үзвэл Дорноговь аймгийн иргэн бүр дунджаар 12 мод тарьжээ. Тухайлбал, 2022 онд 289.540 мод, 2023 онд 154.468 мод, 2024 онд 120.346, 275.388 мод тус тус тарьжээ. Өөрөөр хэлбэл жилд дунджаар 200

орчим мянган мод тарьсан байна. Харин энэ жил мөн л 250 гаруй мянган мод тарихаар төлөвлөжээ.

Тус аймагт аймгийн Байгаль орчны газар байгууллагынхаа дэргэд мод үржүүлгийн талбай байгуулж өнгөрсөн оноос эхний үржүүлгийн модоо авч байгууллага албан газар, хувь хүмүүст олгож байгаа юм.

Тухайлбал, өнгөрсөн онд хаврын мод тарилтад зориулан таван төрлийн 15000 гаруй тарьц, суулгацыг мод үржүүлгийн талбайгаас бэлтгэж, аймгийн төвийн нийтийн эзэмшлийн талбай, цэцэрлэгт хүрээлэн болон аж ахуйн нэгж, байгууллага, иргэдэд 20000 гаруй тарьц, суулгац олгожээ.

Харин Сайншандаас урагш 20 км-ийн зайд Зэвсэгт хүчний Жанжин Штабын харьяа “Мод үржүүлэг-агроэкологийн сургалтын төв” нь жилд нэг сая тарьц, суулгацыг бэлтгэхийн зэрэгцээ сургалт, судалгааны ажлыг явуулахаар ажиллаж байна. Мөн Таван толгой-Зүүнбаян чиглэлийн төмөр зам дагуух хамгаалалтын зурваст мод нийлүүлэхээс гадна Дорноговь аймгийн иргэд аж ахуй нэгжид мод, суулгац нийлүүлнэ.