Австралийн агаарын тээврийн "Qantas" компани Airbus A350-1000ULR загварын нисэх онгоцуудаар хэт холын нислэгүүдийг үйлдэж эхлэхээр бэлтгэж байна. 

Тус компани түүхэн дэх хамгийн урт буюу 22 цаг үргэлжлэх арилжааны шууд нислэгүүдийг эхлүүлэх гэж байгаа бөгөөд шинэ чиглэлүүд нь Сидней хотыг Лондон, Нью-Йорк хотуудтай холбоно. Эдгээр нислэгийг тусгайлан өөрчилсөн A350-1000ULR (Ultra Long Range) онгоцуудаар үйлдэх ба уг онгоц нь нэмэлт түлшний савтай тул агаарт илүү удаан байх боломжтой. 

Одоогоор хамгийн урт тогтмол нислэгийг "Singapore Airlines" компани үйлддэг. Ньюарк, Сингапур хотуудын хооронд үйлддэг уг нислэг нь 18.5 орчим цаг үргэлжилдэг байна.

Шинэ онгоцны хамгийн гол онцлог нь бүх зорчигчдод нээлттэй, суудлын хэсгүүдийн хооронд байрлах "алжаал тайлах бүс"  юм.  Энд зорчигчид биеийнхээ чилээг гаргах, видео заавраар дасгал хийх, ундаа, хөнгөн зууш авах боломжтой. Энэхүү шийдэл нь урт нислэгийн үед цагийн зөрүүний нөлөөг багасгах, зорчигчдын тав тухыг нэмэгдүүлэх зорилготой ажээ.

Энгийн A350-1000 онгоц нь 300 гаруй зорчигчийн суудалтай байдаг бол "Qantas"-ийн онгоцуудаар 238 хүн зорчих ажээ. Суудлын тоог цөөлснөөр гарсан зай талбайг зорчигчдын ая тухыг хангахад ашигласан бөгөөд хоёр метр орчим урттай тусдаа ор бүхий нэгдүгээр зэрэглэлийн зургаан люкс өрөө, дэлгэгддэг суудал бүхий бизнес ангиллын 52 суудал, премиум эконом ангиллын 40 суудал мөн эконом ангиллын 140 суудалтай. Мөн бүх зорчигч өндөр хурдны Wi-Fi ашиглах, Bluetooth-ээр чихэвчийг онгоцны үзвэрийн системд холбох боломжтой. 

“Project Sunrise” хэмээн нэрлэсэн энэхүү төслийг анх 2017 онд танилцуулж байсан боловч COVID-19 цар тахлын улмаас хойшилжээ. Нислэгүүдийг 2027 оны эхний хагаст эхлүүлэхээр төлөвлөж байна. Тус компани уг нислэгт ашиглахаар “Airbus A350-1000” загварын 12 нисэх онгоц худалдаж авчээ. 

Kazinform