БОУАӨЯ хууль бус ан агнууртай тэмцэх хяналт шалгалтыг эрчимжүүлэх, гэмт хэрэг, зөрчлөөс урьдчилан сэргийлэхээр хяналт шалгалт хийж байна.

Сүүлийн 3 жилийн хяналт шалгалтын дүнгээс харахад хууль бус ан агнууртай холбогдох зөрчил дутагдлын тоо багасахгүй байгааг БОУАӨЯ мэдээллээ.

Дээрх хяналт шалгалтад энэ оны 1 дүгээр улиралд 700 орчим иргэн, хуулийн этгээдийг хамруулж, хууль бус ан агнууртай холбоотой 165 зөрчлийг илрүүлж, 25 зүйлийн 669 амьтан хууль бусаар агнасныг тогтоожээ. Тухайлбал, ойн зэрлэг гахай 10, цагаан зээр, шилүүс, мануул, нохой зээх, бугын эвэр, туулай, ахууна, өмхий хүрэн тус бүр нэгийг, чоно 18, хярс 2, үнэг 4, ятуу 5, эрээн хавиргат хахилаг 3, шар шувуу 2, шивэр хадран загас 91, цурхай 15, сугас 16, мөнгөлөг цагаан загас 14 гэхчлэн 175 загасыг хууль бусаар агнаж, эд эрхтэнг худалдан тээвэрлэсэн байна. 

Зөрчил үйлдсэн 165 хүнд 48 сая төгрөгийн торгууль, 204 сая, 184 мянга гаруй төгрөгийн нөхөн төлбөр оногдуулсан байна.

Иймд зөвшөөрөл авч ан агнах, Амьтны тухай хуулиар тогтоосон хориглосон хугацааг мөрдөж, амьтны үржлийн үе буюу хаврын улиралд загас барихгүй, бусдаас ан амьтны гаралттай зүйл худалдан авахдаа гарал үүслийн тодорхойлолтыг шаардах, ан амьтны эсрэг гэмт хэрэг, зөрчлийн талаарх мэдээллийг холбогдох төрийн байгууллагад мэдээлэх, хүүхэд багачуулд байгаль, зэрлэг амьтдыг хайрлан хамгаалах үзлийг төлөвшүүлэх хэрэгтэй юм.