Байгаль орчны хууль тогтоомжийг хэрэгжүүлэх, Үндэсний аудитын газрын шаардлагыг биелүүлэх хүрээнд “Оюу толгой” ХХК-ийн нөхөн сэргээлтийн барьцаа хөрөнгийг бүрэн төлүүлжээ.

Тус компанийн байгаль орчны менежментийн 2010-2023 оны төлөвлөгөөнд тусгасан ч төвлөрүүлээгүй, мөн 2025-2026 оны барьцаа хөрөнгийг нэмж тооцон, нийт 9.9 тэрбум төгрөгийг өнгөрсөн сард бүрэн төлүүлснийг БОУАӨЯ мэдээлэв.

Байгаль орчны менежментийн төлөвлөгөөг хэрэгжүүлэх зардлын 50 хувьд дүйцэх хэмжээний барьцаа хөрөнгийг нөхөн сэргээлтийн тусгай дансанд төвлөрүүлэхээр холбогдох талуудтай уулзаж, аудитын байгууллагаас өгсөн албан шаардлагын дагуу төлбөрийг барагдуулжээ. Ингэснээр уул уурхайн үйл ажиллагааны улмаас байгаль орчинд учирч болзошгүй сөрөг нөлөөг багасгах, нөхөн сэргээлтийг санхүүгийн баталгаатай хэрэгжүүлэх эрх зүй, санхүүгийн нөхцөл бүрдэж байгаа юм.